Tuncel Kırhan: “Təəssüf ki, Azərbaycanın Türkiyədəki səfirliyində Rəsulzadə sevgisi yox, Rəsulzadə siyasətini gördük”
Azərbaycanın Türkiyədəki səfirliyində Demokratik Cümhuriyyətin banilərindən Məhəmməd Əmin Rəsulzadənin 130 illik yubileyi Azərbaycan Kültür Dərnəyi təmsilçilərinin etirazı ilə müşayiət olunub.
“BBC Azərbaycanca”nın məlumatına görə, tədbirin sonunda Dərnəyin baş katibi Tuncel Kırhan səfirlik təmsilçilərinə tədbirdə ona çıxış üçün söz verilməməsinə etiraz edib. O bildirib ki, tədbirin əvvəlində ona adının çıxışçılar siyahısında olduğunu deyiblər.
“Amma təəssüf ki, 1947-ci ildən bu yana Türkiyədə müstəqillik mücadiləsi aparan, Rəsulzadə tərəfindən qurulmuş dərnəyin təmsilçisinə söz verilmədi”, – deyə Kırhan etiraz edib.
Tuncel Kırhan onu da qeyd edib ki, Ankarada Məhəmməd Əmin Rəsulzadənin adını daşıyan litseyə dəstək üçün dəfələrlə dərnək tərəfindən səfirliyə olunmuş müraciətlər mübahisələrə səbəb olub. “Təəssüf ki, səfirlikdə Rəsulzadə sevgisi yox, Rəsulzadə siyasətini gördük”, – deyə Dərnəyin baş katibi vurğulayıb.
Səfirlik təmsilçiləri isə bildirib ki, Azərbaycan Kültür Dərnəyi nümayəndəsinin çıxış edə bilməməsi “vaxt azlığı” ilə bağlı olub.
