Fuad Qəhrəmanlı: «Səfirin açıqlamasında həm hakimiyyət, həm də cəmiyyət üçün ciddi mesajlar var»
“Bizim ölkəmiz öz vətəndaşlarının hüquqlarına hörmətlə yanaşan demokratik dövlətlərlə əlaqələrə üstünlük verir.Bu mənada demokratik və iqtisadi islahatlar xüsusi əhəmiyyət kəsb edir. Hesab edirəm ki, Azərbaycan demokratik və iqtisadi islahatlar sahəsində irəliləyiş əldə etdikcə ölkələrimiz arasında əlaqələr daha da inkişaf edəcək”. Bu sözləri mediaforum.az saytına müsahibəsində ABŞ-ın ölkəmizdəki səfiri Riçard Morninqstar söyləyib.
O daha sonra bildirib ki, qeyri-enerji sektorunun inkişafı sahəsində birgə əməkdaşlıq Azərbaycanın Dünya Ticarət Təşkilatından müsbət rəy alması üçün önəmli haldır: “Bundan başqa, hesab edirik ki, gömrük, vergi sahəsində islahatlar, eyni zamanda müxtəlif bazar yönümlü fəaliyyətlərdə rəqabətliliyin daha da inkişaf etdirilməsi önəmlidir. Azərbaycan iqtisadiyyatının qeyri-enerci sektorunun inkişafı vacibdir”.
Səfir müsahibəsində 9 oktyabr seçkilərinə də toxunub: “Bu sirr deyil ki, ötən ilin oktyabrında keçirilən prezident seçkisindən sonrakı dövr problemli və çətin oldu. Seçki prosesi məsələsində Azərbaycan hökuməti ilə fikir ayrılıqlarımız da olub. Demokratiya ilə bağlı məsələlər Azərbaycanla qarşılıqlı münasibətlərimizdə çox mühüm müzakirə mövzusu olaraq qalacaq.
Biz güclü şəkildə inanırıq ki, Azərbaycanın gerçək və real demokratiya yolunda öz irəliləyişini davam etdirməsi vacibdir. Buraya real siyasi plüralizm, əsas hüquqların təmin olunması, real, gerçək demokratiya şəraitində vətəndaşların faydalana biləcəyi imkanların yaradılması, o cümlədən ifadə azadlığı, azad mətbuat, ədalət mühakiməsinin müvafiq şəkildə, yəni qayda-qanuna uyğun şəkildə keçirilməsi daxildir. Gömrük, vergi, rəqabətlilik sahəsində islahatların aparılması vacibdir. Investisiyaların yatırılmasına şərait yaradan, həvəsləndirən, proqnozlaşdırıla bilən biznes mühitinin yaradılması önəmlidir”- deyə ABŞ səfiri bildirib.
Müsahibədən göründüyü kimi, ABŞ səfiri bütün hallarda demokratiya mesajı verir və ABŞ üçün demokratiyanın prioritet olduğunu bildirir.
AXCP sədrinin müavini Fuad Qəhrəmanlı ABŞ üçün demokratiya məsələsinin ön planda olduğunu və ABŞ səfirinin açıqlamasında da bunun əks edildiyini bildirdi: “Səfirin mövqeyi onu göstərir ki, iki ölkə arasındakı münasibətlərin möhkəmliyi demokratik dəyərlərə münasibətdən asılı olacaq. 9 oktyabr seçkilərindən sonra da ABŞ prinsipial mövqe göstərdi və faktiki olaraq seçkilərin legitimliyini tanımadı. Bundan sonra da həlledici məqamlarda sərt münasibət sərgilənəcək. Səfir də səsləndirdiyi fikirlərlə öz ölkəsinin mövqeyini, yanaşmasını, siyasətini ifadə edir. Eyni zamanda bu müsahibədə Azərbaycan hakimiyyətinə və Azərbaycan cəmiyyətinə o mesaj çatdırılır ki, ABŞ öz prinsiplərinə xəyanət etməyəcək və demokratiya iqtisadi maraqlara, enerji sektorundakı əməkdaşlığa qurban verilməyəcək. Həm də Azərbaycan cəmiyyəti anlamalıdır ki, insan haqları, demokratiya məsələsində tək deyil və bu məsələ qlobal xarakter daşıyır, dünyanın əsas gündəmidir. Bundan öncə ABŞ prezidenti Barak Obama da Konqresdə çıxış edərək, demokratiya uğrunda mübarizə aparanların yanında olacaqlarını bildirdi. Ümumilikdə səfirin müsahibəsin pozitiv qiymətləndirmək olar”.
Akif
