Hərbçilər Yanukoviçi təcili tədbirlər görməyə çağırdı
Kerri müxalifət liderləri ilə danışıqlara başladı, Ukrayna hakimiyyətini güc tətbiq edənləri cəzalandırmağa çağırdı
AŞPA Monitorinq Komitəsinin üzvləri yaxın günlərdə Kiyevə gələcək
Ukrayna hərbçiləri prezident Viktor Yanukoviçi ölkədə vəziyyətin sabitləşməsi üçün təxirəsalınmaz tədbirlər həyata keçirməyə çağırıblar. Bu barədə Ukrayna Müdafiə Nazirliyinin saytında məlumat yerləşdirilib. “Ukrayna Müdafiə Nazirliyinin aparatında çalışan və xidmət keçən Silahlı Qüvvələrin hərbi qulluqçuları və əməkdaşları öz vətəndaşlıq mövqeyini ifadə edərək, Ali Baş Komandanı ölkədəki vəziyyətin sabitləşməsi və cəmiyyətdə razılaşmanın əldə olunması üçün mövcud qanunvericilik çərçivəsində təxirəsalınmaz tədbirlər həyata keçirməyə çağırıblar”- deyə açıqlamada bildirilir.
Qeyd edək ki, yanvarın 27-də Ukraynanın müdafiə naziri Pavel Lebedev bəyan edib ki, Silahlı Qüvvələr ölkədəki münaqişəli vəziyyətə qarışmır və onun həllində iştirak etmək niyyətində deyil. O, bəzi siyasətçilərin Ordunu ölkədəki siyasi böhranın həllinə cəlb etmək təşəbbüslərini təxribat kimi qiymətləndirib. Viktor Yanukoviç hələlik məsələyə münasibət bildirməyib. Prezident iki gün əvvəl xəstəliyi ilə əlaqədar məzuniyyətə çıxıb.
İtkin düşmüş “Avtomaydan” liderinin qulağını kəsiblər
Ukraynada yanvarın 22-dən itkin düşmüş “Avtomaydan”ın lideri Dmitri Bulatov ötən gün döyülmüş halda tapılıb. Bulatovun açıqlamasına əsasən naməlum şəxslər ona ağır işgəncələr verib, qulağını kəsib, hətta çarmıxa çəkiblər – onun əllərində deşilmiş yaralar var.ÿ”5-ci kanal” telekanalının müxbirləri Bulatovun döyülmüş vəziyyətdə çəkilən şəklini yayımlayıblar. Bulatov onu kimlərin oğurladığını bilmir. Lakin qeyd edir ki, cinayətkarlar rus ləhcəsi ilə danışırmış. Naməlum şəxslər onun gözlərini bağlayaraq 8 gün işgəncələrə məruz qoyduqdan sonra avtomobillə hadisə yerindən uzaqlaşdırıb yol kənarına atıblar.ÿUkrayna milisi bir neçə gün əvvəl iş üzrə “qəsdən adam öldürmə” maddəsi ilə cinayət işi açıb. Dmitri Bulatov itkin düşməzdən əvvəl “Facebook” səhifəsində hakimiyyət tərəfindən ona qarşı təzyiqin artdığını bildirmişdi.
Etirazlar başlanandan 1200-dən çox insan xəsarət alıb
Kiyevdə kütləvi iğtişaşlar başlanandan 1200-dən çox etiraz aksiyası iştirakçısı xəsarət alıb. Bu barədə Kiyev şəhər administrasiyasının mətbuat xidməti məlumat yayıb: “2013-cü ilin noyabrın 30-dan 20014-cü ilin yanvarın 30-dək 1231 etiraz aksiyası iştirakçısına tibbi yardım göstərilib, onlardan 681 nəfər xəstəxanaya yerləşdirilib. Hazırda 63 kütləvi aksiya iştirakçısı xəstəxanalarda stasionar müalicə almaqdadır”. Qeyd edək ki, Ukrayna Baş Prokuroluğunun iki gün əvvəl yaydığı bəyanatında Ukraynada kütləvi etiraz aksiyaları zamanı 234 nəfərin saxlanıldığı, onlardan 140 nəfərin həbs olunduğu bildirilib.
Maydanda qurulmuş barrikadalar sökülməyəcək
Kiyevin Qruşevski küçəsində etirazçılar tərəfindən quraşdırılmış barrikadalar sökülməyəcək, hakimiyyət isə saxlanılan fəalları qeyd-şərtsiz azadlığa buraxmalıdır. Bunu Ukrayna Milli Müqavimət qərargahında dünən keçirilmiş brifinqdə Maydanın komendantı, “Batkivşina” fraksiyasından olan deputat Andrey Parubiy bəyan edib. Onun sözlərinə görə, Maydan Regionlar Partiyasının dəstəyi Ali Rada tərəfindən qəbul olunmuş amnistiya haqqında qanunun tələblərinə əməl etməyəcək: “Bizim mövqe dəyişməzdir. Biz insanları binalara dəyişə bilmərik. Hakimiyyət həbsxanalara atılan insanları birtərəfli qaydada azad etməlidir”. “Batkivşina” fraksiyasından olan digər deputat Həmkarlar Ittifaqı Evinin komendantı Stepan Kubiv isə bildirib ki, Ukrayna Milli Müqavimət qərargahının etibarlı mənbələrdən əldə etdiyi məlumata əsasən, hakimiyyət Maydanda provokasiyalar təşkil etmək məqsədilə Krımda atletik bədən quruluşlu gəncləri toplamağa başlayıb.
DIN: “Kiyevdəki aksiyalar öncədən planlaşdırılıb”
Ukrayna Daxili Işlər Nazirliyinin (DIN) müstəntiqləri ölkədə keçirilən etiraz aksiyalarının öncədən planlaşdırıldığı və bu zaman güc variantının da nəzərdən keçirildiyi haqqında məlumatları var. Bunu Ukrayna DIN-in Baş Istintaq Idarəsinin rəis müavini Aleksandr Qnativ deyib. Onun sözlərinə görə, təhqiqat çərçivəsində müxalif “Batkivşina” partiyasına məxsus serverdən götürülən informasiyalar da bunu təsdiqləyir: “Bu məlumatlar göstərir ki, ötən il noyabrın 21-dən Kiyevdə başlayan aksiyalar öncədən planlaşdırılıb və bu zaman hadisələrin güc yolu ilə inkişafı da nəzərdən keçirilib”.
Prezident mürtəce qanunların ləğvi və amnistiya haqqında qanunu imzaladı
Viktor Yanukoviç Ali Radanın “16 yanvar qanunları” adlanan sənədlərin ləğvi barədə qəbul etdiyi qanunu və ölkədə baş verən qarşıdurmada iştirak edənlərin amnistiyası haqqında qanunu imzalayıb. 16 yanvarda qəbul edilən və müxalifətin ölkədə diktatura qurmaq cəhdi kimi qiymətləndirdiyi, bu səbəblə ölkədə qarşıdurmanın kəskinləşməsinə səbəb olan qanunlar Ali Radanın yanvarın 28-də keçirilən toplantısında ləğv edilib. V.Yanukoviç özünün parlamentdəki nümayəndəsi, Regionlar Partiyasının deputatı Yuri Miroşniçenko tərəfindən hazırlanan və qəbul olunan “Dinc aksiyalarla bağlı təqib olunma və cəzalandırmalara yol verilməməsi və onların neqativ nəticələrinin aradan qaldırılması haqqında” qanunu da imzalayıb. 11 maddəlik bu qanun dinc aksiyalar zamanı cinayətlərə və inzibati hüquqpozmalara yol verən şəxslərin cinayət məsuliyyətindən azad olunmasını nəzərdə tutur. Lakin bu, müəyyən şərtlərin yerinə yetirilməsindən sonra mümkündür.
“Amnistiya haqqında qanun hiylə və şantaj yolu ilə qəbul olunub”
Ali Radanın yanvarın 29-da keçirilmiş növbədənkənar sessiyasında qəbul olunmuş Amnistiya haqqında qanunu şantaj, təzyiq, saxtakarlıq və hiylə yolu qəbul olunub. Bu bəyanatla yanvarın 30-da Ukrayna müxalifətinin liderləri Arseni Yatsenyuk, Vitali Kliçko və Oleq Tyaqnibok çıxış ediblər: “Kütləvi şəkildə özgə kartlarla səs vermə kimi hallar qeydə alınıb, bu isə Ukraynanın Konstitusiya normalarının pozulması deməkdir. Konstitusiyanın pozulmasına görə prezident Yanukoviç şəxsən məsuliyyət daşıyır”. Qeyd edək ki, qanuna əsasən, etirazçılar 3 şərtə əməl etməlidir – bütün inzibati binaları boşaltmalı, Qruşevski küçəsini tərk etməli və ölkənin bütün şəhərlərində küçələri və yolları boşaltmalıdır. Qeyd olunan şərtlər icra olunduqdan sonra 15 gün ərzində həbs olunanlara amnistiya elan ediləcək.ÿƏks halda qanun öz qüvvəsini itirmiş olacaq.
Kerri müxalifətlə nə danışıb?
ABŞ dövlət katibi Con Kerrinin Ukrayna müxalifətinin liderləri ilə telefon danışığında Ukraynanın Avropaya inteqrasiyasını dəstəkləyib və böhranın dinc yolla nizamlanmasına çağırıb. Bu barədə jurnalistlərə Dövlət Departamentinin nümayəndəsi Cen Psaki bildirib: “Dövlət katibi Ukraynanın Avropaya inteqrasiyasını dəstəkləyib və demokratiyanı dinc yolla qorumağa çağırıb. O həmçinin 16 yanvar tarixli qanunların ləğv olunmasını qeyd edərək, əldə olunmuş irəliləyişi vurğulayıb”. Onun sözlərinə görə, Vaşinqton hesab edir ki, qarşıdurma zamanı güc tətbiq edən şəxslər məsuliyyətə cəlb olunmalıdır. Ukrayna müxalifəti və vətəndaş cəmiyyətini Con Kerri ilə telefon danışığında “UDAR” partiyasının lideri Vitali Kliçko, “Svoboda” partiyasının lideri Oleq Tyaqnibok, “Batkivşina” fraksiyasının lideri Arseni Yatsenyuk, estrada müğənnisi Ruslana və Ali Radanın deputatı Pyotr Poroşenko təmsil ediblər.
ABŞ dövlət katibi bu gün Kliçko və Yatsenyukla görüşəcək
“The Telegraph”ın yazdığına görə, bu gün Con Kerrinin Ukrayna müxalifət liderləri ilə görüşü olacaq. Almaniyada Münhen konfransında baş tutacaq görüşdə müxalifəti Vitali Kliçko və Arseni Yatsenyuk təmsil edəcək. Kerri bildirib ki, əsas müzakirə mövzusu Ukrayna hökuməti ilə müxalifəti arasında başlamış danışıqların bundan sonrakı gedişi olacaq. O, tərəfləri danışıqları davam etdirməyə çağırıb və ABŞ hökumətinin bu istiqamətdə lazımi dəstək verəcəyini bildirib.
Merkel Ukraynaya qarşı sanksiyaları müzakirə edib
Almaniya kansleri Angela Merkel Berlində Polaşanın baş naziri Donald Tuskla Ukraynadakı vəziyyəti və Yanukoviç hökumətinə tətbiq ediləcək sanksiyaları müzakirə edib. Merkel bildirib ki, hakimiyyətə qarşı sanksiyaların tətbiqi hələlik gündəmdə deyil. Kanslerin fikrincə, hazırda əsas məsələ hakimiyyətlə müxalifət arasında danışıqların dayanmamasıdır. D.Tusk isə bildirib ki, Ukrayna daxilində kəskin konfrantasiyaya imkan verilməməlidir.
Hakim partiya: “Sanksiyalar Ukraynadakı vəziyyəti bir az da kəskinləşdirəcək”
Dünən AŞPA prezidenti Ann Brasser hakim Regionlar Partiyasının deputatı Ivan Popesko və “Batkivşina” fraksiyasının sədr müavini Serqey Sobolyovla görüşüb. Görüşdə AŞPA-nın Ukrayna ilə bağlı qəbul etdiyi son qətnamə və Yanukoviç hökumətinə apreldə sanksiyaların tətbiq oluna biləcəyi məsələsi müzakirə olunub. Ivan Popesku bildirib ki, iqtidarla müxalifət arasında dialoq üçün yaranmış istənilən meydanı qoruyub saxlamaq lazımdır. Sanksiyalar isə məsələyə qeyri-konstruktiv yanaşmaqdır. Onun sözlərinə görə, hazırkı şəraitdə Ukrayna hökumətinə sanksiyaların tətbiqi ölkədəki vəziyyəti bir az da kəskinləşdirəcək.
O da məlum olub ki, fevralın ortalarında AŞPA Monitorinq Komitəsinin üzvləri Kiyevə səfər edəcək.