Yollar buz bağladı; ictimai nəqliyyat fəaliyyətini dayandırmağa məcbur oldu; yüzlərlə sərnişin küçələrdə qaldı; elektirik enerjisi fasilələrlə verildi
Qar yağdı. Və həmişəki kimi yenə Azərbaycan və onun paytaxtı iflic oldu. Yollar buz bağladı, ictimai nəqliyyat fəaliyyətini dayandırmağa məcbur oldu, yüzlərlə sərnişin küçələrdə qaldı. Yollarda avtomobillərin hərəkəti demək olar ki, mümkünsüz vəziyyətə düşüb. Bəzi yollarda qartəmizləyici maşınlar işləsə də, yollara duz səpilsə də, bir çox ərazilər hələlik nəzarətsiz qalıb.
Əsasən Biləcəri aşırımı, Biləcəri-Binəqədi yolu və digər ərazilər hələ də qardan təmizlənmir. Bundan başqa, mərkəzi ərazilər, “Nərimanov”, “Gənclik” metrostansiyası yaxınlığı da qarın ağuşuna qərq olub. Rəsmilər isə işlərin görüldüyünü deyir.
Rəsmi məlumatlara görə, yollara 1000 tondan çox duz səpilib. Ancaq bu da öz köməyini göstərməyib.
Bakıya yağan güclü qar fəsadlar da yaradıb. Ölkə kimi qara hazır olmayan bir çox sürücülərdə yollarda qalmağa məhkum olub. Bakının Yasamal, Binəqədi, Xətai və Sabunçu rayonlarında yolların buz bağlaması eniş və yoxuşlarda avtomobillərin hərəkətini mümkünsüz edib. Paytaxt yollarında eləcə də körpü və tunellərdə uzun tıxaclar meydana gəlib.
Bakı-Sumqayıt yolunda nəqliyyatın hərəkəti tamamilə dayanıb. Yolda qalan sürücülər geriyə – şəhərə doğru qayıtmağa məcbur olublar.
Metronun “20 Yanvar” dairəsindən Sulutəpə qəsəbəsinə qədər bütün yollarda tıxac yaranıb. Insanlar avtobuslardan düşərək, qarda, çovğunda evlərinə piyada getməli olublar. Sürücülər vəziyyət bir neçə gün belə davam edərsə bakıda həyatın donacağını deyirlər.
Qar təkcə yollarda tıxac yaratmayıb. Eləcə də elektrik enerjisinin verilməsində də fasilələr yaranıb. Paytaxtın Binəqədi, Qaradağ, Nizami rayonlarında, Biləcəri, Hövsan qəsəbələrində, o cümlədən Lənkəran, Masallı, Astara, Lerik, Qusar, Yevlax və bir neçə rayonun kəndlərində elektirik enerjisi fasilələrlə verilib.
Ramin DEKO
