Elşad Məmmədov: “İntihar edəndən sonra heç kim məni dəli və alkoqolik adlandırmasın”
“Avesta” konsernin prezidenti Hacı İbrahim Nehrəmlinin ona məxsus iki mənzilini vermədiyini deyən iş adamı Elşad Məmmədov mediaya müraciətini ünvanlayıb. Fevralın 1-də özünü yandıracağını bəyan edən iş adamı göndərdiyi müraciəti “son müraciət” adlandırıb.
“Mən yetim oğlanam, üç körpə övladım var. Dörd il Azərbaycan ordusunda qulluq etmişəm. Böyük qardaşım Qarabağ qazisidir. İki ildir ki, ailəmlə birlikdə olmazın əziyyətini çəkirəm. Son çıxış yolu kimi intihara əl atacağımı qəzetlər və saytlar vasitəsilə başda ölkə başçısı olmaqla bütün ictimaiyyətə çatdırdım. “Yeni Musavat” qəzetinin 28 yanvar 2014-cü il tarixli sayında mənim intihar etməyimlə bağlı Hacı İbrahimdən “yandır” cavabı gəldi. MTN, DİN və Prokurorluq 1000-dən artıq şikayətimi araşdırmırsa, heç olmasa milyarderin bu sözlərini ölümə təhrik etmə kimi qiymətləndirib cinayət işi açsınlar. Mən haqlı ola-ola Hacı İbrahim məni şərləməkdən də çəkinmir. Bir daha bidirirəm ki, onun dediyi kimi nə Gürcüstana qaçmışam, nə də məni “Bandotdel” tutub. “Skat” restoranını da mən “Yeni Musavat”ın saytında görmüşəm.
Nəyə görə bu qədər ictimailəşmiş işə ölkə başçısı reaksiya vermir? Çünki heç bir hüquq-mühafizə orqanı mənimlə maraqlanmadı. Bilirəm ki intihar etmək haramdı. Ancaq xahiş edirəm, intihar edəndən sonra heç kim məni dəli və alkoqolik adlandırmasın. Mən yetimçiliklə böyümüşəm. Hacı İbrahim 11 il ərzində min bir əziyyətlə əldə etdiyimi pulu əlimdən aldı”.
Ramin DEKO
