PA rəsmisi vətəndaşlarımızın Suriyaya göndərilməsində bəzi beynəlxalq təşkilatların iştirak etdiyini deyir
İlham Ismayıl: «Rəsmi beynəlxalq təşkilat heç vaxt bu işlərin arxasında dayanmaz»
Azərbaycan Prezidenti Administrasiyası ictimai-siyasi məsələlər şöbəsinin müdiri Əli Həsənov Suriyada döyüşən Azərbaycan vətəndaşlarından danışıb. APA-ya açıqlamasında PA rəsmisi vətəndaşlarımızın Suriyaya göndərilməsində bəzi beynəlxalq təşkilatların iştirak etdiyini deyib. “Azərbaycanlı gənclərin, vətəndaşlarımızın qeyri-qanuni yollarla səfərbər olunub, dünyanın müxtəlif qaynar nöqtələrinə, o cümlədən Suriyaya göndərilməsi prosesində bəzi beynəlxalq təşkilatlar da iştirak edirlər. Azərbaycanın müvafiq dövlət qurumları vətəndaşlarımızın Suriyadakı döyüşlərdə iştirakı ilə bağlı məsələ ilə məşğuldur”, – deyə Ə.Həsənov qeyd edib.
Ə.Həsənov hansı beynəlxalq təşkilatları nəzərdə tutur və Azərbaycan bu prosesi əngəlləyə bilərmi?
Təhlükəsizlik məsələləri üzrə ekspert Ilham Ismayıl Azərbaycan vətəndaşlarının Suriya göndərilməsinin arxasında qeyri-rəsmi təşkilatların dayana biləcəyini deyir: “Hansısa dövlətin, tutaq ki, Səudiyyə Ərəbistanının qeyri-rəsmi maliyyələşdirdiyi bəzi təşkilatlar, qruplar var. Onlar bu işdə maraqlıdırlar. Ideoloji cəhətdən də maraqlıdırlar, vəhabiliyi yayırlar. Yeri gələndə təzyiq vasitəsi kimi radikal dindarlardan istifadə edirlər”.
Ekspertin sözlərinə görə, Suriyada hakimiyyəti dəyişmək istəyənlər də bu işdə maraqlı ola bilər. Burda artıq söhbət ideologiyadan, müqəddəs amallardan getmir. Ancaq rəsmi beynəlxalq təşkilat heç vaxt bu işlərin arxasında dayanmaz.
Ekspert Azərbaycanın xüsusi xidmət orqanlarının bunun qarşısını almaq gücündə olduğunu da qeyd etdi. Bunun müxtəlif forma və metodları var. Xüsusi xidmət orqanlarının bunun üçün yetərincə imkanı da var.
Fizzə
