Ukraynanın AŞPA-da səlahiyyəti dayandırıla bilər
Avropa Parlamenti: «Aministiya müzakirələri nəyə lazımdır, insanları sadəcə azad etmək lazımdır»
Kiyevdə dünən də gərgin anlar yaşanıb. Müxalifət tərəfdarlarının ələ keçirdiyi Aqrar Siyasət Nazirliyinin binasında atışma olub. Binada qumbaralar partlayıb, atışma səsləri eşidilib. Binaya daxil olmağa cəhd edən şəxslər müvafiq sərəncama malik olduqlarını bildiriblər. Yaralılar binadan çıxarılıb. Lakin jurnalistlər hadisə yerinə buraxılmayıb. Nazirlik binasının etirazçılardan təmizlənməsi əməliyyatında “Sotni Svyatoslava” adlı dəstənin döyüşçüləri iştirak edib. Həmin şəxslər bildiriblər ki, həbsdə saxlanılan nümayişçilərin azadlığa buraxılmasının əvəzinə nazirlik binasının təmizlənməsinə dair razılaşma var və onlar bu razılaşmanı icra edir.
Kiyev Maydanında isə bir sıra təşkilatların fəallarından ibarət Milli Qvardiya yaradılıb. Ukrayna millətinə and içən hər bir kəs qvardiyaya yazıla bilər. Hazırda qvardiyaya Maydan özünümüdafiə dəstəsi, kazaklar və “Pravıy sektor” adlı təşkilatın üzvləri daxildir. Milli Qvardiya rəhbərliyinin tərkibi yaxın zamanlarda açıqlanacaq.
Yeni baş nazir: «Aqressiya və ultimatumlardan qaçmaq lazımdır»
Nikolay Azarovun istefasından sonra müvəqqəti olaraq baş nazir postunu tutan Sergey Arbuzov ölkədəki vəziyyətlə bağlı açıqlama verib. Arbuzov bildirib ki, hazırdv hökumətlə müxalifət arasında Ukraynadakı mürəkkəb vəziyyətdən çıxış yolu tapmaq üçün dialoq gedir. Və prezident başda olmaqla deputatlar kompromiss üçün əhəmiyyətli addımlar atıblar. Onun fikrincə, tam kompromiss danışıqların bütün tərəflərinə hörmət ediləcəyi təqdirdə mümkündür: «Aqressiya və ultimatumlardan qaçmaq lazımdır. Böhranı aradan qaldırmağın yeganə yolu dialoqdur. Öz tərəfindən hökumət milli stabilliyyə nail olmaq üçün əlindən gələni etməyə hazırdır».
Arbuzov nümayişlər zamanı həyatını itirənlərin yaxınlarına başsağlığı da verib: «Ümid edirəm ki, bundan sonra qurbanlar və zərərçəkənlər olmayacaq».
Rasmussen Rusiyanın Ukraynaya təzyiqini sərt tənqid etdi
NATO-nun baş katibi Anders Foq Rasmussen Avropa Birliyi ilə Assosiasiya sazişi imzalamaması üçün Ukraynaya təzyiq göstərən Rusiyanı sərt tənqid edib. Baş katib bildirib ki, Rusiyanın avroatlantik blokun genişlənməsinə münasibəti açıq-aşkar düşməncəsinədir: «Assosiasiya sazişi Ukrayna üçün böyük önəm daşıya bilərdi. Və çox təəssüf ki, saziş imzalanmadı».
Putin Ukraynanın daxili işlərinə müdaxilə etməyəcəyinə söz verib
Rusiya prezidenti Vladimir Putin Brüsseldə Rusiya-Avropa Birliyi sammitinin yekunlarına dair keçirilən mətbuat konfransında Moskvanın Ukraynanın daxili işlərinə müdaxilə etməyəcəyini bildirib: «Mən düşünürəm ki, Ukrayna xalqı özü hər şeyi qaydasına qoymaq iqtidarındadır. İstənilən halda Rusiya heç vaxt müdaxilə etməyəcək”. Rusiyanın Ukraynadakı münaqişədə vasitəçi rolu ilə bağlı jurnalistlərin sualına cavab verən prezident Putin qeyd edib ki, Kiyev çətin ki vasitəçiliyə ehtiyac duysun: “Vasitəçilər nə qədər çox olsa, problemlər də o qədər çox olacaq”.
Müxalifət hakimiyyətə gəlsə…
Rusiya prezidenti onu da bildirib ki, Ukraynada müxalifət hakimiyyətə gələcəyi təqdirdə Kreml qaz və kreditlər üzrə Ukrayna ilə bağlanılan sazişlərə yenidən baxmayacaq: “Ukraynaya kreditin verilməsi və qazın qiymətinin tədricən aşağı endirilməsi hansısa konkret hökuməti yox, ilk növbədə, Ukrayna xalqını dəstəkləmək zərurəti və niyyəti ilə bağlıdır”. Onun sözlərinə görə, Ukrayna tərəfi qaza görə indiyədək olan ödənişləri və 2014-cü il üzrə olacaq ödənişləri təxirə salmağı xahiş edib: “Bu gəlirlər isə Qazpromun investisiya planlarına daxildir”.
Putin həmçinin “Şərq Tərəfdaşlığı” proqramına toxunaraq, qeyd edib ki, Rusiya və AB ümumi qonşuları olan ölkələrin sabit olmalarında maraqlıdırlar: “Şərq Tərəfdaşlığı proqramı ətrafında səmimi fikir mübadiləsi oldu. Biz ümumi qonşularımız olan ölkələrin sabitliyində və çiçəklənməsində maraqlıyıq”. Putinin sözlərinə görə, bu dövlətlər AB ilə fəal əməkdaşlıq etməklə yanaşı Rusiya ilə tarix boyu formalaşmış sıx əlaqələri qoruyub saxlamağa çalışırlar: “Onlara bu işdə, sözsüz ki, yardım etmək lazımdır. Lakin yeni ayırıcı sədlərin yaradılması yolverilməzdir. Əksinə, vahid Avropanın qurulmasında birgə çalışmaq lazımdır”.
AŞPA-dan Yanukoviçə xəbərdarlıq
Avropa Şurası Parlament Assambleyası «Avromaydan» dağıdılacağı təqdirdə Ukraynanın Strasburqda fəaliyyətini dayandıra bilər. Bu barədə AŞPA-nın qətnaməsində deyilir. «Əgər ölkədə insan haqlarının pozulması halları davam etsə, Maydan etirazları yatırılsa, Assambleya AŞPA-nın 2014-cü ilin aprel sessiyasının ikinci hissəsinin açılışında Ukrayna nümayəndə heyətini müvəqqəti olaraq səs hüququndan məhrum edə bilər», – deyə qətnaəmə bildirilir.
Merkeldən mitinqçilərə dəstək
Almaniya kansleri Angela Merkel Bundestaqdakı çıxışı zamanı Ukraynadakı nümayişçiləri dəstəklədiyini və onların cəsarətini alqışladığını bildirib: “Federal hakimiyyət var gücü ilə bu cəhdləri dəstəkləyəcək. Onlar bizim Avropa Birliyində əsas götürdüyümüz dəyərlər uğrunda mübarizə aparırlar».
Elmar Bork: «Həbs olunanlar qeyd-şərtsiz azad edilməlidir»
Avropa Parlamentinin Xarici Əlaqələr Komitəsinin rəhbəri Elmar Brok Ukraynada həbs olunan mitinqçilərlə bağlı açıqlama verib. Brok bildirib ki, mitinqçilərin azad edilməsi üçün iqtidarla müxalifət arasında danışıqlara ehtiyac yoxdur. Onlar qeyd-şərtsiz sərbəst buraxılmalıdırlar: «Biz başa düşə bilmirik ki, aministiya ilə bağlı nə müzakirə aparmaq olar. İnsanları sadəcə azad etmək lazımdır».
Brok Ukrayna Ali Radasının mürtəce qanunların ləğvi ilə bağlı son qərarını alqışladığını da bildirib.
Müxalifət avropalı deputatlardan nə istəyib?
Brok Avropa Parlamentinin Kiyevə səfər edən nümayəndə heyəti ilə birgə müxalifət liderləri ilə də görüşüb. Bu barədə «Udar» Partiyasından olan deputat Valeri Patskan bildirib: «Biz ölkədəki siyasi vəziyyəti müzakirə etdik. Bildirdik ki, hazırkı şəraitdə Avropanın görə biləcəyi ən yaxşı dəstək Yanukoviç və onun ətrafına sanksiyaların tətbiqidir. Görüşdə həmçinin hakimiyyət tərəfindən fəallara qarşı repressiyalar da müzakirə olundu. Avropa Parlamentinin nümayəndə heyəti Maydanın hadisələrin bundan sonrakı gedişi ilə bağlı mövqeyinin nədən ibarət olduğu ilə maraqlandı. Bildirdik ki, əsas tələblər hakimiyyətin bütünlüklə dəyişməsi, erkən seçkilər və ölkədə konstitusion islahatların aparılmasıdır».
Eşton Yanukoviç və müxalifətlə görüşəcək
Avropa Birliyi diplomatiyasının rəhbəri Ketrin Eştonun Kiyevə səfəri başlayıb. Səfər çərçivəsində Eşton Ukrayna prezidenti Viktor Yanukoviç və müxalifət liderləri ilə görüşməyi planlaşdırır.
