«Tunisdən tutmuş Birmayadək demokratiyanın qurulması uğrundan ciddi cəhdlə çalışan hər kəsi dəstəkləyirik»
ABŞ prezidenti Barak Obama Konqresdəki çıxışında bir sıra mühüm mesajlar verib. Konqresi 2014-cü ili “Hərəkət ili” etməyə çağıran B.Obama deyib ki, bu il Birləşmiş Ştatlar üçün “dönüş ili” ola bilər. Ölkənin iqtisadi inkişafına toxunan prezident ABŞ-ı iqtisadi baxımdan dünyada ən yaxşı mövqedə olan ölkə adlandırıb. Ancaq Obama başlıca sualın bu inkişafın necə davam etdiriləcəyi barədə olduğunu da dilə gətirib. Prezident Obama çıxışının əsas hissəsini ABŞ iqtisadiyyatı və orta sinfin üzləşdiyi problemlərə həsr edib: “Son 10 ildə ilk dəfə olaraq biznes liderləri bildirib ki, Çin artıq yatırım üçün bir nömrəli ölkə deyil, bu, Birləşmiş Ştatlardır”. Obama bildirib ki, iqtisadi inkişafa baxmayaraq bəzi amerikalılar gördükləri işin müqabilində az əmək haqqı aldığı halda, bəziləri ümumiyyətlə işsizdirlər. O, bu problem çıxış yolu minimum əmək haqqının qaldırılmasında, və təhsil imkanlarının artırılmasında və “qırılmış mühacirət sistemi”ni düzəltməkdə gördüyünü deyib.
Çıxışı zamanı Obama eyni zamanda xarici siyasətlə bağlı bir sıra məqamlara toxunub. Bu ilin sonunadək ABŞ-ın Əfqanıstanda missiyasının başa çatacağını vurğulayan prezident Obama elə bu səbəbdən bu il Quantanamo təcridxanasının da bağlanmalı olduğunu dilə gətirib. “Yəmən, Somali, İraq, Mali kimi ölkələrdə terror şəbəkələrini zərərsizləşdirmək üçün tərəfdaşlarımızla birgə işləmişik. Beynəlxalq ictimaiyyətlə birlikdə Suriya xalqının istədiyi gələcəyə nail olması üçün çalışmağa davam edəcəyik”, deyə Obama vurğulayıb.
Çıxışında İranla bağlı siyasətə də yer ayıran prezident təzyiqlə müşayiət olunan Amerika siyasətinin sonda İrannın nüvə proqramını inkişafının qarşısını ala bildiyini deyib. Obama çıxışında eyni zamanda Ukraynada baş verən proseslərə, dünyadakı demokratikləşmə ilə bağlı olaylara da münasibət bildirib. “Tunisdən tutmuş Birmayadək demokratiyanın qurulması uğrundan ciddi cəhdlə çalışan hər kəsi dəstəkləyirik”, deyə Obama qeyd edib.
Fuad Qəhrəmanlı: «Obamanın çıxışı avtoritar rejimlərə qarşı coğrafiyasından asılı olmayaraq mübarizə aparan xalqlara mənəvi və siyasi dəstəkdir»
Obamanın çıxışındakı mesajları şərh etməsi üçün AXCP sədrinin müavini Fuad Qəhrəmanlıya müraciət etdik. Ərəb baharından sonra ABŞ rəhbərliyinin ritorikasında demokratiya ilə bağlı məsələlərə daha çox vurğunun salındığını deyən F.Qəhrəmanlı bildirdi ki, artıq Amerika demokratiyaya dəstək mesajlarını daha aydın və konkret şəkildə ifadə edir. F.Qəhrəmanlı hesab edir ki, Amerikanın bu ritorikası son zamanlar artıq bəzi dövlətlərə münasibətdə də açıq formasada həyata keçirilib: «Amerika rəhbərliyinin bəyanatlarında səsləndirilən fikirlər Ukraynaya münasibətdə həyata keçirilir. Azərbaycanda keçirilən prezident seçkilərinə münasibətdə ABŞ-ın sərt rəyi ifadə olundu və saxta seçkilərin nəticələri tanınmadı. Ona görə də Obamanın çıxışında səsləndirdiyi fikirlərə yalnız ritorika kimi yanaşmaq olmaz. Bu açıqlama həm də ABŞ xarici siyasətinin üstünlük verdiyi prioritetləri qabartmaqla yanaşı, avtoritar rejimlərə qarşı mübarizə aparan xalqlara ünvanlanan bir mesajdır. Təcrübə göstərir ki, demokratik proseslərin uğur qazanması üçün yalnız daxili şərtlər deyil, beynəlxalq şərtlər də tələb olunur. Bu baxımdan Amerikanın bu sahədə təşəbbüskar kimi çıxış etməsi, demokratik proseslərə dəstək verməsi, demokratiyanın qələbə qazanması baxımından olduqca mühüm əhəmiyyət daşıyır. Obamanın çıxışı avtoritar rejimlərə qarşı coğrafiyasından asılı olmayaraq mübarizə aparan xalqlara mənəvi və siyasi dəstəkdir».
Xəyal