Hacı Surxay problemlərin yaranma səbəbini Aşurbəy məscidi ilə əlaqələndirdi
Əyyub Kərimov: «Əgər din xadimi həyəcan təbili çalırsa, hüquq-mühafizə orqanları bu məsələni araşdırmalıdır»
Azərbaycanlı gənclərin Suriyaya döyüşməyə getməsi və bunun acı nəticələri hələ də davam edir. Bəlli olan budur ki, bu gənclər müəyyən dairələr tərəfindən təsir altına salınır, onlarla ciddi təbliğat aparılır və psixoloji olaraq döyüşə hazırlanırlar.
Ötən gün Qafqaz Müsəlmanları Idarəsində dindarların iştirakı ilə keçirilən tədbirdə qurumun sədri Şeyxülislam Hacı Allahşükür Paşazadə bu məsələyə münasibət bildirib: “Suriyada indi şəhadət adıyla gedib döyüşürlər ki, bu da düzgün deyil. Özü də pula görə gedib döyüşürlər. Peyğəmbər (s.ə.s) buyurub ki, pulla gedib döyüşmək şəhadət sayılmır. Əminəm ki, dövlət bununla bağlı hansısa tədbir görəcək. Çünki bu, Islama qarşı yolverilməzdir” – deyə Şeyx bildirib.ÿ
Iclas zamanı Hacı Surxay Məmmədli çıxış edərək baş verənlərə səbəb kimi Aşurbəy məscidini göstərib: “Şeyx xahiş edirəm ki, bir məsələni də qeyd edim. Içərişəhər məscidlərindən olan Aşurbəy məscidinə yüzlərlə insan axışır, gözyaşlı valideynlər deyir ki, əgər məscid bizə fəlakət gətirərsə, belə məscid bizə lazım deyil. Şeyx bunu nəzərə alın, əgər tədbirlər görülməsə, 2-3 aydan sonra görəcəksiz ki, orada vətəndaş müharibəsi olub. Mən bunu deyirəm və sözümün də arxasında dayanıram”.
Şeyx isə cavabında bildirib ki, Içərişəhər məscidlərindən Hacı cavabdehdir: “Indi dediklərinizi yazılı formada bizə təqdim edin və məsələ ilə bağlı dövlət lazımi tədbir götürəcək”.
Hacı Surxay Məmmədlinin təklifinə ilahiyyatçı Elşad Miri sərt reaksiya verib: “Məscidin bağlanılması təklifinin QMI-nin toplantısında səslənilməsi bu qurumun geridə qalmasının göstəricisidir. Bu təklif, əslində, din adı altında sovet dövründən qalma ateist fikirin təzahürüdür” – deyə Elşad Miri bildirib.
Bəs, Hacı Surxayın səsləndirdiyi fikirlərlə bağlı hansı tədbirlər görülməlidi?
Hüquqşünas Əyyub Kərimov bildirdi ki, yaranmış problemlə bağlı konkret ünvan göstərilirsə, aidiyyatı orqanlar dərhal araşdırma başlamalıdır: “Əgər baş verənlərin haradan qaynaqlandığı bildirilirsə, din xadimi həyəcan təbili çalaraq ünvan göstərirsə DIN, Prokurorluq, MTN bu istiqamətdə müvafiq iş aparmalıdır. Yəni bu işlərlə kim məşğul olur, bu təbliğatı kimlər aparır, adamlar sərhəddi necə keçirlər və.s bu kimi məqamlara aydınlıq gətirilməlidir. Əgər hər hansı hüquq pozuntusu aşkar edilərsə, fakt üzrə cinayət işi də açıla bilər. Cinayət işini hansı orqanın aparmasına gəlincə, bunu MTN-də edə bilər. Bunlar sonrakı mərhələdir. Əsas odur ki, bu məsələyə ciddi yanaşılmalıdır”.
Səslənən fikirlərlə bağlı MTN-nin münasibətini öyrənməyə çalışsaq da gün ərzində zənglərimizə cavab verilmədi.
Akif
