ABŞ Dövlət Departamentinin Cənubi Qafqaz ölkələri üzrə xidmətinin yeni təyin olunmuş direktoru Con Mark Pommerşeym Azərbaycanda üç günlük səfərdə olub. Səfər Azərbaycanda siyasi və iqtisadi durumla yaxından tanışlıq məqsədi daşıyıb. Con Mark Pommerşeym səfər zamanı dövlət rəsmiləri, vətəndaş cəmiyyəti və mətbuat təmsilçiləri ilə görüşüb.
Mətbuat nümayəndələri ilə görüş səfərin sonuncu günündə, yanvarın 28-də keçirilib. ABŞ səfirliyində keçirilən görüşdə “Azadlıq” qəzeti baş redaktorunun birinci müavini Rahim Hacıyev, “Turan” agentliyinin direktoru Mehman Əliyev, “Zerkalo” qəzetinin baş redaktoru Elçin Şıxlı, “Yeni Nəsil” Jurnalistlər Birliyinin rəhbəri Arif Əliyev, “Exo” qəzetinin baş redaktoru Rauf Talışinski və “Amerikanın səsi” və “Turan” agentliyinin əməkdaşı Tapdıq Fərhadoğlu iştirak ediblər.
Görüşdə ölkədəki ümumi ictimai-siyasi ab-hava, xüsusən də söz azadlığı sahəsində vəziyyət və mətbuatın qarşısında duran problemlər müzakirə olunub.
