Bakının Nizami rayonunda yerləşən “Laçın” ticarət mərkəzinin satıcıları bu gün səhər saatlarında etiraz aksiyası keçirməyə çəhd ediblər.
Satıcıların “Movqe.az”-a verdiyi məlumata görə, onlar rəhbərliklə görüşmək istəyirlər. Narazılıq bazarda kirayə paltarlar verənlərin yerinin dəyişdirilməsi ilə bağlı onlardan əlavə pul tələb olunmasıdır: “Bizi yuxarı mərtəbəyə köçürəcəklər. Yəni yerimizi dəyişirlər. Buna görə deyiblər ki, kirayə paltar verən hər obyekt bu başdan 1000 manat pul ödəməlidir. İndi yığışıb gedirik rəhbərliyin yanına görək nə məsələdir. Burada heç kəsin bu başdan 1000 manat ödəmək imkanı yoxdur. Hamımız arenda haqqını ödədikdən sonra evimizə çörək pulu aparırıq. Narazılığımız buna görədir. Hamımız obyektimizi bağlayıb rəhbərliklə görüşmək üçün gözləyirik”.
Movqe.az məsələni araşdırmaq məqsədilə univermaqdan kirayə haqlarının yığılmasında və yerlərin arendaya verlməsində məsul olan şəxs ilə əlaqə saxlayıb. Nazim adlı şəxs pulla bağlı məsələdə işçilərlə rəhbərlik arasında anlaşılmazlıq olduğunu söyləyib: “Əslində anlaşılmazlıq yaranıb. Biz fevral ayından onları bir mərtəbə yuxarıya köçürəcəyik. Ona görə xəbərdarlıq etmişik ki, hər kəs kirayə haqqını əvvəldən ödəsin. İndi onlar ayın sonu ödəniş edirlər. Yer haqqını yuxarı köçəndən sonra ayın əvvəli edəcəklər. Onlar da elə başa düşüblər ki, bunlardan əlavə pul istəyir. Çünki həmişə ayın sonu yer haqlarını ödəyiblər. İşçilər yanımıza gəldi onları başa saldıq. Anlaşılmazlıq aradan qalxdı”.
