«Bu döyüşçülərin bir qismi islamçılar tərəfindən aparılan təbliğatın nəticəsində, bir qismi isə muzdla gedir»
Əlövsət Əliyev: «Bunun hər ikisi üçün Azərbaycanda münbit şərait mövcuddur»
Suriyada döyüşən və döyüşlərdə öldürülən azərbaycanlılarla bağlı demək olar hər gün yeni məlumatlara rast gəlinir. Dəqiq statistik rəqəmlər açıqlanmasa da ölənlərin sayının 100-dən çox olduğunu bildirilir. Artıq onların qohumları da bunu təsdiq edir. Ancaq Azərbaycanın Xarici Işlər Nazirliyi bununla bağlı maraqlı sayıla biləcək açıqlama yayıb. Nazirlik rəsmisi bildirib ki, Azərbaycan vətəndaşlarının Suriyada olub-olmaması ilə bağlı müxtəlif yollarla ciddi araşdırmalar davam etdirilir. Bu açıqlamadan belə nəticəyə gəlmək olar ki, azərbaycanlıların Suriyada döyüşməsi ilə bağlı dəqiq məlumatlar yoxdur.
Ancaq istənilən halda Azərbaycan hakimiyyətin bu hallarla bağlı narahatçılığı hiss olunur. Suriyaya yollanan Azərbaycan vətəndaşları sərhəddi keçmək üçün əsasən qardaş Türkiyədən tranzit ölkə kimi istifadə edirlər. Hətta bəzi məlumatlara görə, Azərbaycan hakimiyyəti bununla bağlı öz narazılığını da gizlətmir.
Əslində azərbaycanlı döyüşçülərin Suriyaya getməsinə görə kimlər məsuliyyət daşımalıdır?
Miqrantlara Hüquqi Yardım Ictimai Birliyinin rəhbəri Əlövsət Əliyev Cinayət Məcəlləsinin 279-cu maddəsinə görə qanunsuz hərbi birləşmələrdə iştirak etmənin cinayət məsuliyyətinə səbəb olan əməl olduğunu deyir. Azərbaycan hökuməti, hüquq mühafizə orqanları da bu məsələni araşdırmalıdır. Ən azından əməliyyat axtarış yolu ilə müəyyən olunmalıdır ki, həmin şəxslər hərbi birləşmələrdə iştiraka harada cəlb olunurlar: “Bunlar yəqin ki, muzdlu döyüşçülərdir. Bir qismi islamçılar tərəfindən aparılan təbliğatı nəticəsində şəhidlik zirvəsinə ucalmaq üçün bu yola gedirlər. Onların sayı onlarladır. Bir qismi isə muzdla gedir. Bunun hər ikisi üçün Azərbaycanda münbit şərait mövcuddur. Həm qaraguruhçu islamçıların bu kimi halları təbliğ etməyə real şərait var. Buna qarşı mübarizə olduqca zəifdir. Əgər bu şəxslər Azərbaycan respublikasının ərazisində qanunsuz hərbi birləşmələrə cəlb olunursa, bununla bağlı hüquq mühafizə orqanları ciddi araşdırma aparmalıdır. Əməliyyat axtarış fəaliyyətlərini genişləndirməlidirlər. Bu cür şəxslərin, qrupların cinayət məsuliyyətinə cəlb olunmasını təmin etməlidirlər”.
Fizzə
