Dəyərli oxucular!
Azərbaycanda tənqidçi medianı susdurmaq üçün hakimiyyətin gördüyü tədbirlər barədə sizə məlumat vermək artıqdır. Azad söz və ölkə gerçəklərinin ifadəsi televiziyalardan qəzet səhifələrinə çoxdan qovulub. Son illərdə isə qəzetlərlə haqq-hesab çəkilir. Təəssüf ki, avtoritar Azərbaycan hakimiyyəti bu istiqamətdə də xeyli irəliləyib. Artıq axırıncı “istehkam” kimi “Azadlıq” qəzetinə tuşlanıblar.
Azərbaycan hakimiyyəti qəzetləri cəmiyyətin həyatından çıxarmaq, ya da lüzumsuzlaşdırıb makalaturaya çevirmək üçün son tədbirlər kimi onların metrostansiya keçidlərində və küçələrdə satışına qadağa qoyub. Bu, əlbəttə bütün qəzetlərə zərbədir. Lakin başqalarından fərqli olaraq, hər hansı rəsmi və qeyri-rəsmi dotasiyası olmayan, fəaliyyətini yalnız satışdan əldə etdiyi gəlirlə quran “Azadlıq” üçün daha böyük zərbədir.
Açığı, hakimiyyətin son il yarımda apardığı “Azadlıq”ı susdurmaq kampaniyası qəzet üçün ən kritik fazasına qədəm qoyub. Qəzet faktiki olaraq bütün gəlir mənbələrindən məhrum edilib. Küçələrdə və metrostansiya keçidlərində satışın tamam qadağan olunduğu bir vaxtda əsas yayımçılardan biri “Qasid” firması da “Azadlıq”a olan, artıq 70 min manatı keçmiş borcunu vermir. O biri tərəfdən isə KİV-ə Dövlət Dəstəyi Fondu qəzetlə əməkdaşlığı dayandırıb, onun layihələrini maliyyələşdirməkdən imtina edib. Şübhəsiz ki, bu da hakimiyyətin “Azadlıq”ı sıradan çıxarmaq tədbirlərindən biridir.
Beləliklə, dəyərli oxucular, böyük bir tarixi olan qəzet indi bağlanmaq təhlükəsilə üz-üzədir. Ümidimiz yalnız, abunəçilərimizin sayını artırmağadır. Hər zaman olduğu kimi, bu ağır çağımızda da güvəndiyimiz fədəkar və sadiq oxucularımz, sizlərsiz. Yenə sizləri köməyə çağırmaq məcburiyyətindəyik.
Hər zaman çağırışımıza ürəkdən hay verib, köməyimizə yetdiniz. “Azadlıq” sizlərin çiynində bərqərar olduğunu etiraf etməkdən qürur duyur və yorulmaz dəstəyinizə görə sizlərə minnətdardır. Elə bu minnətdarlıq hissi ilə növbəti çağırışımıza da müsbət cavab verəcəyinizi gözləyirik. Sizləri qəzetimizə abunə olmağa və ətrafınızdakıları da buna sövq etməyə səsləyirik.
Abunə olmaq üçün:
Qaya mətbuat yayımı (tel: [012]5646345, [012]4656713) və Azərmətbuat yayım şirkəti (tel: [012]4404694/75, [012]4402785) ilə əlaqə saxlaya;
Yaxud bu linkə (https://docs.google.com/forms/d/16btntlcsuae7p34ZaBvr-hmRgWkh_jASNpLzEybru5c/viewform) daxil olmaqla elektron abunə anketini doldura bilərsiniz.
Dəstəyinizə güvənirik. Sizin və bizim AZADLIQımız naminə.
“Azadlıq”dan oxuculara çağırış
•
