Elmi-yaradıcılıq fəaliyyətində yaş senzinin tətbiqi anormal haldır
Azərbaycan Milli Elmlər Akademiyasının (AMEA) rəhbərliyi bu qurumda çalışanlara qarşı radikal tədbirləri davam etdirir. “Modern.az”ın məlumatına görə, Elmlər Akademiyası rəhbərliyinin növbəti addımı akademiyanın nəzdindəki institutlarda çalışan işçilər üçün yaş məhdudiyyəti senzinin tətbiqilə bağlıdır. Elmlər Akademiyasının adlarının çəkilməməsini istəməyən yaşlı elmi işçiləri təklifin alimlər arasında ciddi narazılıq doğurduğunu deyib.
Məlumata görə, akademiya rəhbərliyi artıq bu qurumun institutlarının rəhbərlərinə yaş məhdudiyyəti senzinin tətbiqi barədə göndəriş ünvanlayıb. Eyni zamanda, Elmlər Akademiyasının rəhbərliyi məsələyə baxılması üçün Nazirlər Kabinetinə də elmi işçilərə yaş məhdudiyyəti senzinin tətbiqilə bağlı təklif göndərib.
Xatırladaq ki, hazırda Azərbaycandakı rəsmi idarə, müəssisə və təşkilatlarda işçilərə yuxarı yaş senzi kimi 65 yaş məhdudiyyəti tətbiq olunur.
Milli Elmlər Akademiyası Rəyasət Heyətinin ictimaiyyətlə əlaqələr şöbəsinin müdiri Səid Hüseynov “lent.az”a bildirib ki, bu, ötən il dekabrın 25-də Akademiya işçilərinin attestasiya ilə bağlı verdiyi qərarla əlaqədardır. Həmin qərara əsasən, Elmlər Akademiyasında çalışan 18-60 yaş arası şəxslərlə əmək müqavilələri 4, 60 yaşdan yuxarı şəxslərlə isə 1 il müddətinə bağlanacaq. Fevralın 1-dən aprelin 30-dək isə Elmlər Akademiyası işçilərinin attestasiyası keçiriləcək.
Şöbə müdirinin sözlərinə görə, yeni işçilərin işə qəbulu bir qayda olaraq, Əmək Məcəlləsinin tələblərinə uyğun, müddətli əmək müqavilələri əsasında həyata keçiriləcək.
Ekspert Qubad Ibadoğlu deyir ki, sözügedən addım Milli Elmlər Akademiyasında administrativ vəzifələrə tətbiq oluna bilər. Lakin elmi-yaradıcılıq fəaliyyətində yaş senzinin qoyulmasını normal hesab etmək olmaz: “Bu addım ola bilsin, müəyyən administrativ vəzifələrdə çalışanlara tətbiq edilsin. Adətən belə vəzifələrdə menecerlik qabiliyyəti işləyir. Menecerlik qabiliyyəti də bəzən yaşla əlaqədar olaraq kompüterlə işləmək, müəyyən xarici dil bilmək qabiliyyətlərini nəzərdə tutur. Bu mənada, administrativ baxımdan götürəndə bunu normal qəbul etmək olar. Amma elmi baxımdan bunu normal hesab etmirəm”.
Nigar
