İki nəfərin ölümünə səbəb olan hadisəyə baxmayaraq, ərazidə söküntü işləri davam etdirilir
Paytaxtın Heydər Əliyev prospektində yanvarın 25-də baş vermiş dəhşətli olay – sökülməkdə olan binanın yola uçması iki gəncin həyatına son qoydu.
Xatırladaq ki, bina yolun kənarında dayanmış “Shevrolet Niva” markalı maşının üstünə aşarkən avtomobilin içində iki nəfər – Asiman Ələkbərov və Cavid Bayramlı olub. Onlar yaralı vəziyyətdə maşından çıxarılıb 5 saylı xəstəxanaya aparılsalar da, hər ikisi yolda keçinib.
Hadisə nəticəsində daha 6 maşına da ziyan dəyib.
Asiman Ələkbərlinin 26, Cavid Bayramlının 22 yaşı varmış. Cavid Bayramlı evin tək oğlu idi. Azərbaycan Dövlət Rəssamlıq Akademiyasının 4-cü kurs tələbəsi olan Cavidin atası da bir neçə il öncə vəfat edib.
Baş Prokurorluğun mətbuat xidmətinin rəhbəri Eldar Sultanov “trend”ə bildirib ki, hadisə ilə əlaqədar cinayət işi başlanıb. Onun sözlərinə görə, faktla bağlı Nərimanov Rayon Prokurorluğunda Cinayət Məcəlləsinin 222.3-cü (Tikinti, mədən işlərinin və sair işlərin aparılmasının təhlükəsizlik qaydalarını pozma; eyni əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsilə başlanmış cinayət işi üzrə araşdırmalar gedir. Artıq zəruri ekspertizalar təyin olunub.
Göydən daş parçaları “yağır”
Ötən gün sözügedən ünvana baş çəkib, ərazidə söküntü işlərinin davam edib-etmədiyilə maraqlandıq. Vəziyyət əvvəlki kimi idi – yeni söküntü işləri, yeni dağıntı… Amma ötən günlərlə müqayisədə indi təhlükəsizliyə az da olsa, riayət edilirdi. Metronun “Nəriman Nərimanov” stansiyasının yaxınlığında tikilən tunel bağlı idi. Bundan başqa, yolun bir hissəsi də qırmızı lentlə “kəsilmişdi”. Buradan da keçmək qadağan idi. Bu qadağalara əməl olunması üçün Post Patrul Xidmətinin əməkdaşları da əraziyə cəlb olunmuşdu.
Buldozerlər isə yenə söküləcək binaların üstündə işlərini görür, vurulan zərbələrdən iri-iri daş parçaları yerə tökülürdü. Bir sözlə, heç nə olmamış kimi, söküntü işləri sürətlə davam edirdi.
Metronun “Nərimanov” stansiyasının yaxınlığında, Heydər Əliyev prospektində “Saatlı bina”nın ətrafından başlayaraq Heydər Əliyev Mərkəzinə qədər olan bütün 3, 4 və 5 mərtəbəli binalar sökülür. Yerində isə yeni “göydələnlər”in tikiləcəyi bildirilir.
Onu da qeyd edək ki, Heydər Əliyev prospektikndəki indi sökülən binaların üzləri bir müddət əvvəl bahalı daşlarla örtülmüşdü. Bu təmir işlərinə büdcədən milyonlarla manat vəsait sərf olunmuşdu.
Sökülən binaların sakinlərinə bildirilib ki, onlara yeni tikiləcək “göydələnlərdə” mənzil veriləcək. Amma yeni binalar tikilib istifadəyə verilənə qədər onlar kirayə yaşamalı olacaqlar. Bunun üçün onlara aylıq 300-500 manat kirayə haqqı verilir.
Məlumata görə, sözügedən ərazidəki binaların sökülüb yerlərində yeni “göydələnlərin” tikilməsi həm Heydər Əliyev Mərkəzinin ətrafını gözəlləşdirmək, həm də 2015-ci ildə Bakıda keçiriləcək Avropa Olimpiya Oyunlarına görə şəhəri abadlaşdırmaq məqsədi daşıyır.
Söküntü işlərini, tikiləcək binaları hansı şirkətin həyata keçirdiyi barədə isə heç bir məlumat yoxdur. Sadəcə, ərazidə üstündə “Bakı Şəhər Icra Hakimiyyəti” yazılmış “KamAZ”lar gözə dəyir.
Ramin DEKO
