Poltava vilayətinin Kremençuk şəhərində Maydan fəalları meriyanı tutmağa cəhd göstərib. Unian saytının məlumatına görə, bir qrup fəal meriya binasına daxil olub. Şəhər merinin müavini Viktor Kalaşnik onlara etiraz etsə də, aksiyaçılar buna məhəl qoymayıb. Binaya daxil olmaq istəyən etirazçıların qarşısını milis kəsib və bu zaman kiçik toqquşma baş verib. Nəticədə meriyanın qapıları sındırılıb. Daha sonra mer Oleq Babayev Maydan fəalları ilə danışıqlara başlayıb. Danışıqların nəticəsində belə bir razılıq əldə edilib ki, yanvarın 27-də aksiyaçıların tələbi ilə şəhər sovetinin növbədən kənar sessiyası keçirilsin. Sessiyanın Müstəqillik meydanında keçirilməsi planlaşdırılır və orada prezident Yanukoviçin istefası tələbi ilə müraciəətin ediləcəyi gözlənilir. Eyni zamanda meriya binasında sabaha qədər bir neçə aksiyaçının və iki müxalif yönlü deputatın qalmasına dair razılıq əldə edilib.
azadlıq.info
