«Rusiya Ukraynanı Qərbə uduzduğunu anladığından Cənubi Qafqazda sərtləşir»
Vəfa Quluzadə: «Cəbhə xəttində atəşkəsin pozulmasına görə məsuliyyəti Rusiya daşıyır»
Dünən də Azərbaycan Hərbi Hava Qüvvələrinə məxsus hərbi təyyarələr yenidən cəbhə xəttində uçuşlar həyata keçiriblər. “ANS press”in verdiyi məlumata görə, Tərtər və Ağdam rayonlarının təmas xəttinə yaxın ərazilərində uçuşlar həyata keçirilib.
Qeyd edək ki, bundan bir gün əvvəl də hərbi təyyarələrimiz cəbhə xəttində günün ikinci yarısında bir neçə uçuş reallaşdırmışdı.
Artıq bir neçə gündür ki, Azərbaycan Ermənistan qoşunlarının təmas xəttində gərginlik səngimək bilmir. Bu günlərdə atəşkəsin dəfələrlə pozulması artıq adi hala çevrilib. Azərbaycan Müdafiə Nazirliyinin mətbuat xidmətinin dünən səhər yaydığı məlumata görə, cəbhədə vəziyyət gərgin olaraq qalır. Verilən məlumata görə, ermənilər cəbhənin müxtəlif istiqamətlərində sutka ərzində ümumilikdə 201 dəfə atəşkəs rejimini pozublar.
Bu arada ABŞ Dövlət Departamenti Azərbaycanla Ermənistan ordularının təmas xəttində baş verən gərginlikdən narahat olduğunu dilə gətirən bəyanatla çıxış edib. Dövlət Departamentinin rəsmi nümayəndəsi Mari Harf cümə günü bildirib ki, güc tətbiqi Dağlıq Qarabağ münaqişəsini həll etməyəcək: “Biz hesabatları görmüşük və hər yedə oluğu kimi burda da insan itkilərinə çox kədərlənirik. Bizim mövqeyimiz dəyişməz olaraq qalır – güc tətbiq edilməsi bu münaqişəsini həll etməyəcək. Biz tərəfləri güc tətbiq edilməsində və güclə təhdid edilməsində vaz keçməyə çağırırıq”.
Onun sözlərinə görə, ABŞ əvvəlki kimi münaqişənin sülh nizamlanmasının nailiyyəti üçün Azərbaycanla və Ermənistanla iş aparılmasına sadiqdir.
Maraqlıdır ki, atəşkəsin intensiv şəkildə pozulması Ermənistanla Azərbaycanın xarici işlər nazirlərinin yanvarın 24-də Parisdə keçirdiyi görüşdən sonraya təsadüf edir. Xatırladaq ki, məhz bu görüş ərəfəsində Rusiyanın xarici işlər naziri Sergey Lavrov münaqişə tərəflərinə mesaj sayıla biləcək bəyanatla çıxış etmişdi. S.Lavrov vurğulamışdı ki, Qarabağ probleminin həlli münaqişə tərəflərindən asılıdır.
Bütün baş verənlər nəzərə alınarsa, cəbhə xəttində atəşkəsin intensiv şəkildə pozulması nəyin görsənişi sayıla bilər?
Politoloq Vəfa Quluzadə hesab edir ki, cəbhə xəttində atəşkəsin pozulması təsadüfi deyil. Bir qayda olaraq bu cür hadisələrin baş verməsi Rusiyadan qaynaqlanır: “Rusiyanın Ermənistanın ordusuna tam nəzarəti var. Çox zaman Ermənistan ordusu heç dövlət başçısının xəbəri olmadan müxtəlif aksiyalar həyata keçiriblər. Levon Ter Petrosyanla o zaman prezident səlahiyyətlərini icra edən Yaqub Məmmədov sülhə imza atanda Şuşa işğal olundu. Halbuki tərəflər atəşkəsin elan olunduğunu bəyan etmişdilər. Baş verən hadisədən Ermənistanın dövlət başçısı pərt olmuşdu”.
Hazırda baş verən hadisələrin isə Qərbə bir mesaj olduğunu düşünən V.Quluzadə vurğuladı ki, Kreml Ukraynanı Qərbə uduzduğunu anlayır: “Qərb Rusiyaya meyilli Ukrayna hakimiyyəti ilə əməkdaşlıq etmək istəmir. Rusiya Qərbin dəstəyi üzündən Yanukoviçlə bərabər müxalifəti ram edə bilmir. Rusiya Qarabağda atəşkəsi pozmaqla Qərbin Qafqazdakı maraqlarına təhlükə yaratmağa çalışır. Rusiya qərbə onun mesajını ünvanlayır ki, biz sizin maraqlarınızı Cənubi Qafqazda tam məhv edə bilərik. Yəni Rusiya Ermənistanın adı ilə Azərbaycanın başqa ərazilərini də işğal edə bilər”.
Xəyal
