Azərbaycana qarşı sayqısızlıq, yoxsa Əliyevin işçilərinin səriştəsizliyi?
Davosda Azərbaycan və Israil prezidentləri arasında keçirilən görüşdə masanın üzərində yalnız Israil bayrağının olması ölkə ictimaiyyətinin narazılığına səbəb olub. Istər sosial şəbəkələrdə, istərsə də xəbər saytlarında bu məsələ müzakirə mövzusudur. Müzakirə iştirakçılarının bir qismi bunu Israilin Azərbaycan dövlətinə qarşı hörmətsizliyi kimi dəyərləndirib. Amma bəziləri də bu vəziyyətin yaranmasında Azərbaycan Xarici Işlər Nazirliyini günahkar sayır.
Qeyd edək ki, bu qəbildən olan hallar əvvəllər də yaşanıb. Dəfələrlə Ilham Əliyevin digər ölkələrin dövlət və hökumət başçıları ilə görüşündə ya Azərbaycan bayrağı tərs asılıb, ya da ümumiyyətlə olmayıb.
Klassik Xalq Cəbhəsi Partiyasının (KXCP) sədri Mirmahmud Mirəlioğlu da “moderator.az”a açıqlamasında məlum hadisəni Azərbaycana qarşı sayqısızlıq kimi dəyərləndirib. Habelə, partiya sədri olaylarda Azərbaycan prezidentinin protokol xidmətinin əməkdaşlarının da günahkar olduğunu qeyd edib: “Şübhəsiz ki, iki dövlət rəsmisi arasında keçirilən görüşdə hər iki tərəfin bayrağı ortada olmalıdır. Xüsusilə də, əgər tərəflərdən birinin bayrağı varsa, o zaman digər tərəfin də bayrağı masaya qoyulmalıdır. Israil prezidenti ilə Ilham Əliyev arasında keçirilən görüşdə yalnız Israil bayrağının ortaya qoyulmasını Ilham Əliyevin protokol xidmətində çalışan insanların səriştəsizliyi kimi dəyərləndirirəm. Çünki bu, çox böyük bir yanlışlıqdır və bunu əsla adi diqqətsizlik kimi xarakterizə etmək olmaz. Bu, Israilin Azərbaycan hakimiyyətinə olan münasibətinin göstəricisidir. Bu, onu göstərir ki, Israil həm də Azərbaycan hakimiyyətini heçə sayır, onu ciddiyə almağa lüzum görmür”.
Tanınmış hüquqşünas Namizəd Səfərov isə bu məsələdə yəhudiləri deyil, elə özümüzünküləri günahkar sayır: “Doğrusu, bu hakimiyyətin və məmurların bayrağımıza münasibətini bildiyimdən, belə faktlara o qədər də böyük önəm vermirəm. Ancaq eyni zamanda, bu faktı dövlət başçılarının rəsmi görüşlərində, beynəlxalq münasibətlərdə protokol qaydalarının pozulması kimi qiymətləndirirəm. Son zamanlar tez-tez baş verən belə halları isə bizim Xarici Işlər Nazirliyinin yarıtmaz fəaliyyətinin nəticəsi hesab edirəm”.
Ramin DEKO
