Sabiq deputat Elşad Abdullayevdən tutmuş, səhhətindəki problemlərə qədər bir çox məsələlərdən danışdı
Sabiq deputat Gülər Əhmədova Apellyasiya Məhkəməsində hakimlər onun vəsatətləri üzrə qərar vermək üçün müşavirədə olarkən jurnalistlərə bir sıra məsələlərlə bağlı açıqlama verib.
Sabiq deputat əvvəlcə Eşlad Abdullayev barəsində danışıb. Bildirib ki, hüquq mühafizə orqanları E.Abdullayevin beynəlxalq axtarışa verildiyini desə də, İnterpolun rəsmi səhifəsində onun adı yoxdur: “Gedin, siz də o səhifəyə baxın, görün o adamın adı orda var, ya yox. Bu adam tutulub bura gətirlməsə, şər-böhtanları qurtarmayacaq. Strasburqun nağıl yazmaq üçün gözəl havası var. Mən özüm 12 il ora gedib-gəlmişəm. Anderson nağılları da Strasburqun havası kimi mühiti olan yerlərdə yazılıb. Elşad Abdullayev üçün 1 milyon 100 manat kimidir. O, Azərbaycanı tərk etməzdən iki gün əvvəl universitet üçün lisenziya almaq adı ilə dekanlardan 2 milyon pul yığıb, sonra da o pulları cibinə qoyub gedib Fransaya. O pul verənlər də sonradan səslərini çıxara bilməyiblər ki, onlardan da “sən bu pulu hardan almısan?” deyə soruşa bilərlər. Hamıya bu sualı verə bilirlər, bir Elşaddan başqa ki, sən bu pulu hardan almısan? Elşad Abdullayevin səhifə aldığı mətbuat orqanlarına üzümü tutub demək istəyirəm ki, hamı ailəsinə, balalarına çörək aparmaq üçün çalışır. Amma bu çörək hansısa qadının şərlənməsindən, balaca övladının göz yaşlarından keçirsə, bu çörək halal deyil, bunu da bilsinlər. İstintaq da, məhkəmə də, əhalinin 99 faizi da yaxşı bilir ki, mən Elşaddan pul almamışam. Elşad mənə pul verməzdi. Bu gün Elşad Abdullayev işi ilə bağlı həbsdə olan adamların arasında yeganə adamam ki, Elşadın mənə pul verməsini sübut edən nə video, nə sənəd, nə şahid var. Vaqif Hüseynovda, Arzu Kazımovda konkret sənədlər var idi, Mirələkbər Seyidovda səhv etmirəmsə, hətta video da vardı. Mən heç özüm də bilmirəm ki, nəyə görə tutulmuşam”.
G.Əhmədova daha sonra həbsində media mənsublarını da günahlandırıb: “Başda “dostum” Sevinc Telmanqızı (“Yeni Müsavat”ın əməkdaşı – red.) olmaqla o qədər yazdılar ki, axırda məni tutdular. Sevinc Babayevanın oğlu Ayxandan qəhrəman düzəltdilər. Bugünlərdə də yazmısız ki, bağı oğurlanıb. Kimdi ki, onun bağını oğurlasınlar? Dünya çempionudur, generaldır? Bunun nəyi xəbərdi? Onu niyə şişirdirsiz? Onun kimliyi o vaxt bəlli oldu ki, xəstə anasını İstanbulda qoyub, gəlib burda onun acığına 2 uşaqlı arvadla toy elədi. İstanbula gedəndə anasından maşının sənədlərini istəmişdi, o da sənədləri oğluna yox, maşın satıcısına verdi. Bu da qayıdıb acıqla toy elədi. Amma anası öləndən sonra o, danışmağa başladı. Mən cavab vermədikcə də elə bildilər ki, günahkaram. Mənə də deyirdilər ki, danışma, deputat olmusan, fikir vermə”.
Sabiq deputat vəkil Elçin Sadıqovun bugünlərdə onunla bağlı dediklərinə də münasibət bildirib. Xatırladaq ki, vəkil Gülər Əhmədovanın sifarişi ilə təcridxanada onun müvəkkili Şəmsiyyə Bəylərqızına təzyiq göstərildiyini, oğlu ilə görüşünə əngəl yaradıldığını demişdi. Vəkilin sözlərinə görə, G.Əhmədova gecələr şəhər gəzintisinə çıxarılması ilə bağlı xəbərlərin yayılmasında Ş.Bəylərqızıdan şübhələnir. G.Əhmədova bu xəbərin tamamilə yalan olduğunu deyib: “Başdan-ayağa yalandır. Elçin Sadıqov Əvəz Zeynallının vəkili idi. O vaxtdan mənə qarşı şər-böhtan kampaniyası aparır. Gah dedi ki, kameramda mebel var. Mən elə bu iki məsələyə görə ondan məhkəməyə, ya da Vəkillər Kollegiyasına şikayət etsəydim, karyerasının üzərindən xətt çəkilərdi. Vəkillik karyerasında yüksəlmək istəyir. Kifayət qədər adamlar var ki, mənim adımdan istifadə edib, özlərini reklam edirlər. Mənim adımla kim reklam olunmaq istəyirsə, ona uzun ömür, can sağlığı, reklamında da uğurlar arzu edirəm. Uşaq da bilir ki, mənim gecələr türmədən gəzintiyə çıxmağım mümkün deyil. Orda hətta adamları da kameradan bir-bir çıxarırlar. Dustaqlar bir-bir kameradan çıxarılır. Onlar bir-birini heç görə bilmirlər. Heç üzləşib salamlaşmaq belə mümkün deyil. Əgər mənim adımın keçməsi Şəmsiyyəyə nədəsə kömək edəcəksə, buna etirazım yoxdur. O da bir qadındır, anadır. 4 hüquq müdafiəçisi – Novella Cəfəroğlu, Səidə Qocamanlı gəlib mənim kameramı görüblər. Mənim kameram orda ən sadə kameralardan biridir. Hətta taburetkalardan birinin üstü yanıb deyə, qəzet sərmişik”.
Səhhətindəki problemlərlə bağlı danışan G.Əhmədova ayaqlarının tutulduğunu deyib “Ayağım gəzməməkdən tutulub. Bir neçə kvadrat metrlik kamerada nə qədər gəzmək olar ki? Nə ağac görürsən, nə hava görürsən. 7 metrlik quyu kimidir. O biri məhkəmədə vəziyyətim pisləşəndən sonra qəbul etdiyim dərmanların hamısı infarkta aiddir”.
G.Əhmədova onu da qeyd edib ki, barəsində çıxarılan 3 il azadlıqdan məhrum etmə hökmü onunçün gözlənilməz olub: “O səbəbdən ki, hər kəs öz günahını bilir. Mənim heç bir günahım yoxdur”.
Aytən
