Azad Istehlakçılar Birliyi bu məsələdə baytarları qınayır
Bakı Şəhər Baytarlıq Idarəsinin əmrilə sümüksüz ətin satışı qadağan edilib. Kənd Təsərrüfatı Nazirliyi yanında Dövlət Baytarlıq Xidmətinin mətbuat xidmətinin rəhbəri Yolçu Xanvəli “virtualaz.org”a açıqlamasında bu barədə məlumat verib.
O bildirib ki, mağazalarda satılan ətin mənşəyinin müəyyənləşdirilməsi üçün sümüksüz ət satışının qarşısı alınır: “Mənşəyi məlum olmayan ətin satışı narahatçılıq doğurur. Buna görə də mağazalar, ət kəsimi məntəqələri, eləcə də bazarlarda sümüksüz ətin satılmasının qarşısı alınacaq. Yalnız alıcının gözü qarşısında ət sümükdən ayrılıb satıla bilər. Yəni, alıcı sümüksüz ət almaq istəyərsə, satıcıdan ətin gözü qabağında sümükdən ayrılaraq verilməsini istəyə bilər”.
Qadağa iri marketlərə də şamil ediləcək. Əmrdən irəli gələn tələblərin yerinə yetirilməməsinə gəlincə, Y.Xanvəli deyib ki, həmin şəxs və ya sahibkar Inzibati Xətalar Məcəlləsinin tələblərinə uyğun cəzalandırılacaq.
Azad Istehlakçılar Birliyinin sədri Eyyub Hüseynov deyir ki, bu qadağa bir daha əhalinin baytarlıq orqanlarına inamının olmadığının göstəricisidir. Nəticədə əhali küçələrdəki ət kəsimi məntəqələrinə daha çox üz tutur: “Insanların baytarlıq xidmətinin vurduğu möhürlərə inamı yoxdur. Əhalinin marketlərə inamı olsa, əti gedib oradan alar, daha gedib küçə kəsimindən almaz. Baytarlar əziyyət çəkib əhalinin inamını qazanmalı, normal ekspertiza aparmalıdırlar. Səhər saat 8-də bazarlara getsək, külli miqdarda ət məhsuluna möhür vurulduğunu görərik. Guya, baytarlar səhərə kimi yatmayıb bu işlə məşğul olub, analiz aparıblar”.
E.Hüseynov qeyd edir ki, mövcud vəziyyət Bakının sallaqxanaya çevrilməsinə səbəb olub: “Baytarlar əhalinin, istehlakçıların inamını qazanmaq üçün real addımlar atmalıdırlar”.
Nigar
