Ağahüseyn Ağayev: «Büdcədən bu rayona ayrılan milyonların hara xərcləndiyi bizə məlum deyil»
Lökbatan sakini Ağahüseyn Ağayev “Azadlıq”a göndərdiyi məktubda yaşadığı qəsəbənin də daxil olduğu Qaradağ rayonunda baş alıb gedən ədalətsizliklərdən bəhs edir. Ağahüseyn Ağayev yazır ki, Qaradağ rayonunun büdcəsi talan olunur, abadlıq işi altında iş adamlarından pul yığılır: “Rayonda 50 mindən çox qanunsuz tikili var. Bunlardan yığılan vəsait milyonlarla ölçülür. Prezident rayonun tədbirlərində iştirak edən zaman onun gəldiyi ərazilər qismən abadlaşdırılır, ondan 30 metr aralı isə bərbad vəziyyətdədir. Bunu bütün qəsəbədə müşahidə etmək mümkündür. Qismən aparılan abadlıq işlərini də günəmuzd fəhlələrə gördürürlər.
Prezident bizim millət vəkili olarkən rayonun büdcəsi 1 milyon manata yaxın idi. Indi isə büdcə milyonlarla ölçülür. Bu pulun hara xərcləndiyi biz sakinlərə məlum deyil. Görülən işlərsə, o dövrlə müqayisədə sıfra bərabərdir. Qəsəbələrdə yollara vurulmuş asfalt örtüyünün qalınlığı 2-4 sm. olduğundan tez sıradan çıxır. Bu da işin içində korrupsiya olduğundan xəbər verir”.
Sosial şöbə