Elşad Abdullayev də aclığa başlaya bilər

Sabiq rektor bacısı oğlunun aksiyanı dayandırmayacağı təqdirdə ona dəstək verəcəyini bəyan etdi

 

Fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayev Mahir Abdullayevin Hüquqlarını Müdafiə Komitəsinin sədri Azad Mürsəliyevin aclıq aksiyasına başlamasına münasibət bildirib.

Elşad Abdullayev “Azadlıq”a göndərdiyi yazılı açıqlamada bildirib ki, Mahir Abdullayev oğurlanandan sonra ona və yaxınlarına ciddi təzyiqlər edilir. Sabiq rektorun sözlərinə görə, hüquq-mühafizə orqanları Mahir Abdullayevi tapmaq əvəzinə zərərçəkmişi susdurmağa yönəlik addımlar atırlar. 

“Mahir Abdullayevin Hüquqlarını Müdafiə Komitəsinin sədri, bacım oğlu Azad Mürsəliyev də bu təzyiqlərə məruz qalan yaxınlarımdan biridir. Başda baş prokuror Zakir Qaralov  olmaqla Azərbaycanın hüquq-mühafizə orqanları MTN zabiti Mahir Abdullayevi axtarıb tapmaq əvəzinə, onu axtaranlara qarşı mübarizə aparırlar, onları təzyiq altında saxlayırlar, təhdid edirlər və qondarma cinayətlərlə həbs edirlər. Azad Mürsəliyev də bütün bunlara etiraz olaraq aclıq aksiyasına başlayıb”.

Bununla belə Elşad Abdullayev Azad Mürsəliyevi bu addımından çəkindirmək niyyətindədir: “Azad Mursəliyev kamil bir şəxsiyyətdir, ziyalıdır, atdığı addımlara görə özünə hesabat verməyi bacaran bir insandır. Uzun müddət hüquq-mühafizə orqanlarında çalışan, yaxın ətrafında nüfuz sahibi olan bir şəxsdir. Qarabağ veteranıdır. Fikrimcə, aclıq aksiyasının onun səhhətinə ciddi ziyan vura bilməsini ona izah edə biləcəm. Və bir dayı kimi onu bu aksiyadan çəkindirməyə nail olacam. Yox əgər Azad Mursəliyev israr etsə, o zaman mən ətrafımda olan bir sıra hüquq müdafiəçiləri və mühacirlərlə  Fransada Azərbaycan səfirliyinin qarşısında aclıq aksiyası keçirməklə ona dəstək verəcəyik”.