AXCP sədri Əli Kərimli yanvarın 23-də Neyrocərrahiyyə İnstitutunda siyasi məhbus, Müsavat başqanının müavini Tofiq Yaqublunun xanımı Maya Yaqubluya və Müsavat fəalı Çingiz Əliyə baş çəkib.
Maya Yaqublu, onun qızı Nərgiz Yaqublu və Çingiz Əli yanvarın 21-də Şəkidən, İsmayıllı hadisələrinə görə həbs edilmiş Tofiq Yaqublunu və başqalarının məhkəməsindən Bakıya qayıdarkən avtomobil qəzasına düşüblər. Maya Yaqublu üzərində əməliyyat aparılmasına ehtiyac olsa da, palata şəraitində saxlanılır. Çingiz Əli isə vəziyyəti daha ağır olduğundan reanimasiya şöbəsindədir.
AXCP sədri və onu müşaiyət edən partiya səlahiyyətliləri – Ali Məclis sədri Həsən Kərimov, sədrin müavini Gözəl Bayramlı, Rəyasət Heyətinin üzvləri Səadət Cahangir, İlham Hüseynli və Eldar Hüseynov əvvəlcə Maya Yaqublunun palatasına gedərək onun vəziyyəti ilə maraqlanıblar. Maya xanımın yanında qızları Nigar və Nərgiz Yaqublu olub. Əli Kərimli onlara təskinlik verib və analarının müalicəsinin gedişi ilə maraqlanıb. AXCP sədri və onu müşaiyət edənlər baş verən hadisədən üzüldüklərini deyib, Maya xanıma Allahdan şəfa diləyiblər.
AXCP rəhbərliyi daha sonra reanimasiya şöbəsinin qarşısında Çingiz Əlinin qardaşı və orada olan Müsavatın Mərkəzi İcra Aparatının rəhbəri Arif Hacılı ilə görüşüb. Əli Kərimli onlardan Çingiz Əlinin durumu haqda məlumat alıb və hadisəyə görə üzüntüsünü ifadə edərək, xəstəyə şəfalar diləyib.
Ramin
