Hakimiyyətə yaxın saytlardan birində AXCP ilə bağlı yanlış məlumat yayılıb. Məlumatda bildirilir ki, AXCP üzvü, Qarabağ veteranı Füzuli Bədirov Milli Şura və müxalifətdə baş verənlərə görə partiya sıralarından istefa verib.
AXCP Mətbuat Xidməti isə partiyanın bu adda üzvünün olmadığını bildirir və yayılan məlumatı “ucuz təxribat” kimi qiymətləndirir. Mətbuat Xidmətinin rəhbəri Natiq Ədilov “Azadlıq”a açıqlamasında deyib ki, məlumat yalan olmaqla yanaşı, mənbənin qərəzli olduğunu və peşə qaydalarına riayət edimədiyini də göstərir. “Normalda belə bir xəbəri hazırlayan nəşr, sayt qarşı tərəflə dəqiqləşmə aparmalıydı. Bunu etməyiblər. Deməli məqsədləri süni ixtilaf toxumu səpməkdir. Biz hələ onu da bilmirik ki, adı çəkilən şəxs doğrudan da sayta danışıb ya yox. Füzuli Bədirov 2008-ci ilə qədər AXCP Yasamal şöbəsində təmsil olunub. Həmin vaxt Aydınlar Partiyası formalaşanda ora keçib. 2008-ci ilin dekabrında Aydınlar Partiyasının qurultayında bu adam partiyanın Nəzarət Təftiş Komissiyasına sədr də seçilib. Ümidvaram bu faktları Aydınlar Partiyası da danmayacaq. O zamanın qəzetləri, xəbər saytları bu haqda kifayət qədər dolğun məlumat yayıb. Bütün bunlar göstərir ki, AXCP-yə qarşı ortada açıq qərəz var. Füzuli Bədirov doğrudan da hardansa istefa veribsə bu yüz fazi AXCP deyil”, – deyə N.Ədilov bildirib.
