“2013-cü ildə Azərbaycan, Rusiya, Ukrayna və Qazaxıstanda siyasi və vətəndaş azadlıqları ilə bağlı vəziyyət xeyli pisləşib”.
Freedom House təşkilatının yanvarın 23-də yaydığı “Dünyada azadlıqların vəziyyəti haqqında- 2014” hesabatında belə deyilir.
Dünyanın 195 ölkəsini və 14 ərazini əhatə edən hesabatda Azərbaycanın adı qeyri azad 48 ölkə arasınmda yer alıb.
Sənədədə Mərkəzi Afrika Respublikası, Ekvatorial Qvineya, Somali, Sudan, Suriya, Eriteria, Şimali Koreya, Səudiyə Ərəbistanı, Türkmənistan, Özbəkistan dünyadakı 10 ən repressiv rejimlərin yer aldığı siyahıya daxil edilib. Belarusda vəziyyətin bu ölkələrdən bir qədər fərqləndiyi qeyd olunur.
Hesabat müəlliflərinin qənaətincə, ötən il Pakistanda vətəndaş və siyasi azadlıqlar baxımından vəziyyət yaxşılaşıb. Əfqanıstanda isə demokratik standartlarla bağlı vəziyyətin pisləşməkdə davam etdiyi bildirilir.
Bu ölkələrdən fərqli olaraq Gürcüstan və Moldovada vətəndaş və siyasi hüquqların təminatı sahəsində tərəqqi olduğu deyilir.
Rəsul Cəfərov: «Azərbaycanda insan haqları sahəsində son illər nəinki irəliləyiş olub, əksinə bu istiqamətdə ciddi geriləmələr baş verib»
Hesabatın ölkədə insan haqları ilə bağlı mövcud vəziyyəti tam əks etdirdiyini düşünən hüquq müdafiəçisi Rəsul Cəfərov vurğulayıb ki, bu sahədə olan vəziyyəti analiz etdikdə rahat görünür ki, Azərbaycanda insan haqları sahəsində son illər nəinki irəliləyiş olub, əksinə bu istiqamətdə ciddi geriləmələr baş verib. O cümlədən irəliyə doğru heç bir addım atılmayıb: «Dövlət qurumları, rəsmiləri insan haqlarının Azərbaycanda qorunduğu ilə bağlı əks açıqlamalar vermələrinə baxmayaraq, bu sahədə durum tam başqadır. Hesabatı obyektiv, dolğun sayıram. Təəssüflər olsun ki, bu reallığı əks etdirən bir hesabatdır». R.Cəfərov hesab edir ki, həm vətəndaş cəmiyyəti, həm də ölkə vətəndaşları olaraq bu hesabatdakı faktlara biganə qalmamalıyıq. Çünki bu hesabat həm ölkənin, həm də vətəndaşların imicinə böyük zərbədir: «Biz vəziyyətin dəyişdirilməsini hakimiyyətdən tələb etməliyik. Azərbaycanda insan haqları ilə bağlı açıq siyasi motivlərlə həbs olunan şəxslər azadlığa buraxılmalıdır».
Xəyal
