Müsavat partiyasının Milli Şuranı tərk etməsi ictimaiyyətdə kəskin tənqid olundu və birliyə zərbə kimi qiymətləndirildi. Bundan sonra Müsavart partiyası, haqqında səslənən fikirlərə cavab verməyəcəyi ilə bağlı yanvarın 8-də bəyanat yaydı və “moratorium” elan etdi.
Ötən gün isə Müsavat başqanın müavini Gülağa Aslanlı APA-ya açıqlamasında “moratorium”un ləğv oluna biləcəyini söyləyib: “Müsavat Partiyası haqqında böhtan deyənlər, özləri haqqında həqiqəti eşitmək məcburiyyətində qalacaqlar. Partiya moratorium məsləsinə yenidən baxa bilər”- deyə Gülağa Aslanlı bildirib.
Müsavat partiyasının “moratorium” dedikdə nəyi nəzərdə tutduğu hələ də bizim üçün qaranlıq qalıb. Partiya moratorium qərarı verəndə susmağı nəzərdə tutmuşdusa, bu günlər ərzində biz bunun şahidi olmadıq. Çünki moratorium elan olunandan sonra müxtəlif saytlara, qəzetlərə Müsavat funksionerlərinin açıqlaması əksik olmayıb. Müsavat partiyasının öncülləri olan Arif Hacılı, Ikram Israfil, Rauf Arifoğlu, Tural Abbaslı, Mustafa Hacıbəyli, Mehman Cavadoğlu və digərləri “moratorium” vaxtı açıqlamalar verdilər və qarşı tərəfə olmazın ittihamlar səsləndirdilər.
“Azadlıq” qəzetinin ötən sayında da müsavatçı Rauf Arifoğlunun rəhbərlik etdiyi “Yeni Müsavat” qəzetinin Milli Şura və onun rəhbərliyi haqqında “Səs” qəzetini kölgədə qoyan yazılar dərc etməsi ilə bağlı müfəssəl məlumat vermişdik. Yəni müşahidə olunan mənzərədə moratorium qərarı hiss olunmadı. Indi isə Müsavat icra olunmayan qərarı ləğv etmək istəyir.
Ədalət xatirinə deyək ki, bu qərara Müsavat partiyasında yalnız Isa Qəmbər əməl etdi. Deməli, moratorium qərarı da yalnız Isa Qəmbərə şamil olunubmuş.
Əgər əməl edə bilsəydilər, moratorium qərarını düzgün seçim adlandırmaq olardı. Belə ki, baş verənlər Müsavatın Milli Şuranı tərk etməsindən sonra start götürdü. Müsavat isə bu gedişlə bağlı ağlabatan açıqlama, ciddi səbəb göstərə bilmədi. Ona görə də susmaq daha əlverişli yol hesab oluna bilərdi.
Ancaq müsavatçılar düşünür ki, moratoriuma tam əməl olunub.
Görəsən, moratorium ləğv olunsa nə baş verəcək? Müsavatın xüsusi buraxılışı olacaq?
Deyəsən, biz bir məqamı unuduruq. Bəlkə bu “moratorium” qərarı demokratik düşərgəni deyil, hakimiyyəti nəzərdə tutaraq verilib.
Çünki bu günlər ərzində “moratorium”çulardan hökumət əleyhinə bir kəlmə söz eşitməmişik.
Azad
