Məcburi köçkün nazirdən kömək istəyir: «Övladlarımın nəinki məktəbə getməyə, heç gündəlik qida, geyim tələbatını ödəməyə də pulu yoxdur»
Qubadlı rayonundan olan məcburi köçkün, Qarabağ müharibəsi veteranı, hazırda Sumqayıt şəhəri, 20-ci məhəllə, ev 20/29, mənzil 9-da məskunlaşan Ramiz Şamxalov “Azadlıq”a məktubunda yazır ki, üç övladı və anası hazırda fəlakət həddində yaşayır. Övladlarının nəinki məktəbə getməyə, hətta gündəlik qida, geyim tələbatını ödəməyə də pulu yoxdur.
Ramiz Şamxalov 1991-ci ildə Qubadlı Rayon Polis Şöbəsində sahə inspektoru işləyib. Yazır ki, qüsursuz xidmətinə görə 2-ci və 3-cü dərəcəli medalla təltif olunub, əlaçı polis işçisi nişanı kimi təltifləri var.
Ramiz Şamxalov daha sonra yazır: “20 oktyabr 1992-ci ildə torpaqlarımızın azadlığı uğrunda gedən döyüşlərdə ağır xəsarət almışam. 26 aprel 2013-cü il tarixli əmrlə Sumqayıt şəhəri 1-ci polis bölməsinə ezam olunmuşam. Ezam olunduğum müddətdə həmin polis bölməsindən 15 iyul 2013-cü il tarixdə xidməti xasiyyətnamə almışam. Buna baxmayaraq, Qubadlı Rayon Polis Şöbəsinin rəisi Nizami Əhmədov vəzifəsindən sui-istifadə edərək, mənə yazılan 3 qat əməkhaqqını istədiyi halda ona vermədiyim üçün mənimlə süni konflikt yaradıb. Bu şəxs Daxili Işlər Nazirliyinin Mərkəzi Ali Attestasiya Komissiyasına saxta attestasiya vərəqəsi yazaraq, komissiya qarşısında 15 avqust 2013-cü ildə məsələ qaldırıb. Rəhbərlik də barəmdə qərəzli məlumatları araşdırmadan yalan məlumatları həqiqət kimi qəbul edib. 19 avqust 2013-cü ildə daxili işlər orqanlarından xidmətə tam yararsız olmağım barədə Attestasiya komissiyasının rəyinə görə, xidmətdən xaric olunmuşam.
Attestasiya keçirilərkən qanunlarımız kobud şəkildə pozulub. Əmək Məcəlləsinin 66-cı maddəsinə əsasən, vətənin müdafiəsi, azadlığı və ərazi bütövlüyü uğrunda hərbi əməliyyatda xəsarət almış işçilər attestasiyadan keçirilmir. Qanunun bu tələbi polis haqqında qanunda, Dövlət Qulluğu haqqında qanunda da öz əksini tapıb. Attestasyia Keçirilməsini Tənzimləyən Hüquq Normalarının 65-ci maddəsinin 5-ci bəndində bildirilir ki, attestasiya olunan işçinin siyasi baxışlarına, mənəvi-əxlaqi kamilliyinə, şəxsiyyətinə, etiqadına, digər şəxsi dəyərlərinə görə, o cümlədən onun intizamlıq dərəcəsinə görə peşəkarlıq səviyyəsinin qiymətləndirilməsi yolverilməzdir. Məni xidmətdən xaric edərkən bu qanunların heç biri nəzərə alınmayıb. Halbuki, torpaqlarımızın azadlığı uğrunda gedən döyüşlərdə ağır xəsarət almışam. 20 noyabr 1993-cü ildə Daşburun qəsəbəsində daxili qoşunların tərkibinə əmrlə daxil olmuşam və xidmətimi döyüş nöqtəsində etməyə başladım. 4 yanvar 1994-cü ildə hazırlanmış əməliyyat nəticəsində Füzuli rayonu Horadiz qəsəbəsinə qədər işğaldan azad edildi. Bütün göstərdiyim xidmətlərdən sonra necə ola bilər ki, yararsız hesab edilirəm? Qanun və sübutlarla göstərirəm ki, məni xidmətdən qanunsuz xaric ediblər. Vətənim, torpağım, evim, ata-babamın qəbri yoxdur, sonda bir parça çörəyimi də əlimdən aldılar. Indi acınacaqlı bir vəziyyətdəyəm. Məni xidmətdən 26 il sonra qanunsuz, əsassız xaric ediblər. Xahiş edirəm, bunları nəzərə alıb, xidmətə – Qubadlı Rayon Polis Şöbəsinə sahə inspektoru vəzifəsinə qaytarılmağıma yardım edəsiniz”.
