Prezidentin sabiq işlər müdiri Akif Muradverdiyevin apelyasiya şikayəti üzrə dünənə təyin olunan məhkəmə prosesi təxirə salınıb. “Mediaforum”un məlumatına görə, A.Muradverdiyevin səhhəti yaxşı olmadığından, o, Bakı Apelyasiya Məhkəməsinə gələ bilməyib. Hakim Vüqar Məmmədov prosesin qeyri-müəyyən müddətə təxirə salındığını açıqlayıb.
Apelyasiya şikayətində Xəzər Rayon Məhkəməsinin qərarının ləğv olunması, Muradverdiyevə bəraət verilməsi və azadlığa buraxılması istənilib.
A.Muradverdiyev Ədliyyə Nazirliyinin Mərkəzi Müalicə Müəssisəsində müalicə olunur.
A.Muradverdiyev Xəzər Rayon Məhkəməsinin 13 dekabr 2013-cü il tarixli hökmü ilə 4 il müddətinə azadlıqdan məhrum edilib. Ötən ilin iyun ayında tutulan Muradverdiyev qaçaqmalçılıqda təqsirli bilinib. Iş materiallarına görə, o, qızıl sikkələri ölkədən çıxarmaq istəyərkən hava limanında həbs olunub. Akif Muradverdiyev isə ittihamları rədd edərək, onun ölkədən qaçaqmal yolu ilə qızıl sikkələri çıxarmaq istədiyi barədə yazılanların həqiqətə uyğun olmadığını bəyan edib.