Milli Şura üzvləri Cəmil Həsənli və Rüstəm Ibrahimbəyova qarşı kampaniyanı pislədi
Son günlər “Yeni Müsavat” qəzetinin və Müsavat funksionerlərinin hədəfində Milli Şuranın sədri Cəmil Həsənli və qurumun fəxri sədri Rüstəm Ibrahimbəyovdur. Hər iki ziyalının açıqlamasındakı bir neçə kəlmə kifayət etdi ki, düşmən elan edilsinlər, ittihamlara məruz qalsınlar.
Əvvəlcə Rauf Arifoğlu Cəmil Həsənlini ağsaqqal kimi qəbul etmədiklərini bildirdi. Daha sonra Müsavatın Divan üzvü Ikram Israfil bildirdi ki, Cəmil Həsənli geri çəkilməli, tarixçi kimi öz missiyasına qayıtmalı və tarixi araşdırmalıydı. Ikram Israfil daha sonra Rüstəm Ibrahimbəyovu hədəf seçdi və onu siyasi keçmişinin qaranlıq olmasında, ziyalıya yaraşmayan mövqe tutmaqda ittiham etdi. Ardınca isə Müsavat partiyası Rüstəm Ibrahimbəyov haqqında bəyanat verdi və onun şər-böhtan kampaniyasının iştirakçısı adlandırdı.
Hər iki ziyalıya qarşı ittihamların səsləndirilməsi Milli Şura üzvləri tərəfindən də etirazla qarşılandı.
Milli Şura üzvü Natiq Kərimov bildirdi ki, Milli Şuranın liderlərini hədəf almaq, onları aşağılamaq yolverilməzdir və heç kimin buna haqqı çatmır: “Adam bir yerdə fəaliyyət göstərib, külüng vurduğu insanlara qarşı belə mövqe sərgiləməz və mən bu əməli qəbul etmirəm. ”Yeni Müsavat” qəzetinin, Müsavat partiyasının bu yanaşmasını qəbul etmirəm və buna son qoyulmasını istəyirəm. Bu ölkənin ləyaqətli insanlarına ləkə atmaq xalqa qarşı xəyanətdir. Ziyalıları aşağılamaq nə yazara, nə partiya funksionerinə hörmət gətirməz. Zaman hər kəsin qiymətini verəcək. Xalqın dəyərli ziyalılarına qarşı kampaniya aparılması, bu xalqın düşmənlərini sevindirir. Mən bu işə qoşulan hər kəsi qınayıram”.
Milli Şura üzvü Fuad Ağayev bildirdi ki, iqtidarın dəyirmanına su tökənlərə enerji sərf etmək lazım deyil: “Ilk olaraq özümüzə sual etməliyik: bütün bu baş verənlər, ziyalıların hədəf alınması kimə sərf edir, kimin marağındadır? Bunun cavabı bütün sualların cavabı olacaq. Mən bu istiqamətdə geniş müzakirə açılmasını istəməzdim. Ancaq, hesab edirəm ki, bu tipli ittihamlar səngiməyəcək. Müxalifətin daxilində nifaq salmaq istəyən qüvvələr var. Necə ki, uzun müddət mənasız mövzularla Milli Şuranın fəaliyyətin zəiflətdilər, indi də bu məsələlərlə yenə də diqqəti hədəfdən yayındırmaq istəyirlər. Milli Şura bu kənar müdaxilələrə enerji sərf etməməli, iqtidarın dəyirmanına su tökən qüvvələrə baş qoşmamalıdır”.
Akif
