Cəmil Həsənli hökumətin şəhidlərə qarşı sayğısız münasibətilə bağlı fikirlərini bölüşdü
“Sərvət yığmaqdan başqa amalı olmayanlardan bundan artıq nə gözləmək olar?”
Milli Şuranın sədri Cəmil Həsənli dünən Şəhidlər Xiyabanını ziyarət edərkən yaşanan rəzalət, eləcə də hakimiyyətin şəhidlərə qarşı sayğısız münasibətilə bağlı fikirlərini “facebook” səhifəsində bölüşüb:
Milli Şuranın Şəhidlər xiyabanını ziyarəti zamanı hakimiyyətin yeni bir rəzaləti ilə qarşılaşdıq. Milli Şura adından şəhid ruhuna hazırlanmış əklili xiyabana buraxmaq istəmirdilər. Azərbaycan müstəqilliyi uğrunda canını fəda etmiş insanların abidəsi önünə əklil qadağası qoyulmuşdu. Şəhidlərin ruhuna bundan böyük həqarət ola bilməzdi. Korrupsiya içərisində boğulan, pul və sərvət yığmaqdan başqa ayrı bir amalı olmayan anti-milli hakimiyyətdən bundan artıq nə gözləmək olardı? Ziyarətə gələnlərin çoxu məşum 20 yanvar gecəsində şəhid məzarlarında yata biləcək istiqlal qəhrəmanları idi. Bu adamların gücü, xüsusilə gənclərimizin iradəsi qarşısında geri çəkilməli oldular. Biz Milli Şura adından şəhid ruhlarına ərməğan olan əklilimizi abidə önünə qoyduq. Amma şok yaşadıq. Bu adamların nadanlığı, cılızlığı, milli-mənəvi dəyərlərdən uzaq olmaları o şoku yaşatdı bizə. Görünür, Azərbaycan hakimiyyəti ölkənin bütün milli-mənəvi dəyərlərini öz düşük düşüncə çərçivəsinə sığışdırmaq istəyir. Xalqın milli mücadiləyə qalxdığı, millətin azadlıq uğrunda canını fəda etdiyi dövrdə başını küncdə-bucaqda girləyən bu adamların başına bundan daha “ağıllı” bir fikrin gələcəyini düşünmürəm.
Bir vaxtlar Xiyabanı ziyarət zamanı heç olmasa, sağ tərəfdə Qarabağ şəhidlərinin baş daşından boylanan igidlərin mübarək simalarını görə bilirdik. Hansı “ağıllısa” sıx kollar əkərək canını vətən uğrunda fəda etmiş bu qəhrəmanları ziyarətçilərdən gizlətdi. Bilmirəm, milli qürur yerimiz olan Qarabağ döyüşçülərinin məzarlarını xalqdan gizlətməkdə bu hakimiyyətin mənzuru nədir. Bacarıqsız adamların günahından 1994-cü ildə Murov əməliyyatında şəhid olmuş 400 Azərbaycan gəncinin yurd yeri də Ikinci Fəxri Xiyabanın arxasında, gözdən-qulaqdan uzaq, dalda bir yerdə salınmışdır. Bütün dünya xalqları öz şəhid övladları ilə fəxr etdiyi halda, Azərbaycan iqtidarının şəhid ruhlarından bu qədər qorxusu, onların məzarlarını dalda yerlərdə saxlamasının ağlabatan bir izahı yoxdur. Bu, bir çoxlarında olmayan əxlaq və mənəviyyat məsələsidir. Qoy Mehmet Akif Ərsoyun şəhid ruhuna yazılmış bu təkrarsız ağısı yatmış vicdanları oyatsın və Azərbaycan qəhrəmanlarının ruhlarınna ərmağan olsun:
Ey bu topraklar için toprağa düşmüş əsgər,
Göydən əcdad enərək öpsə o pak alnı dəyər!
Ey şəhid oğlu şəhid, istəmə məndən məqbər,
Sənə ağuşunu açmış duruyor peyqəmbər!
