Sərdar Cəlaloğlu: «Müsavat və digər müxalifət partiyaları arasında əməkdaşlıq mümkündür»
Arif Hacılı: «Hazırda Müsavat Partiyasında bu mövzu müzakirə olunmur»
Müsavat Milli Şuradan ayrıldıqdan sonra partiyanın atdığı addımla bağlı gətirdiyi arqumentlər keçmiş müttəfiqləri tərəfindən dəstəklənməsə də, amma bu tezisləri müdafiə edənlər oldu. Müsavatın Milli Şuradan getməyi əsaslandırmasını haqlı sayanlar ilk olaraq “Ümid” partiyası və ADP oldu. Onu da xatırlatmaq yerinə düşər ki, hər iki partiya Milli Şura yaranan zamandan bu təşkilatı hədəf alan bəyanatlarla çıxış edirlər.
Maraqlıdır ki, məhz Müsavat Partiyası son illər demokratik qüvvələrin birliyi yaranan zaman “Ümid” partiyasının həmin koalisiyalarda təmsil olunmamasıyla bağlı israrlı mövqe nümayiş etdirib və bu partiya ilə birgə mübarizəni qəbul etməyib.
Hazırda mətbuatda yayılan bəzi məlumatlara görə, yaxın zamanlarda Müsavat partiyasının “Ümid”lə əməkdaşlığına dair rəsmi sənəd imzalana bilər. Bu əməkdaşlığın bir qədər irəli gedərək ADP-ni də əhatə edəcəyi gözlənilir.
Müsavat Partiyası ilə ADP-nin əməkdaşlığının nə dərəcədə mümkün olduğu ilə bağlı partiya sədri Sərdar Cəlaloğlu ilə əlaqə saxladıq. S.Cəlaloğlu bildirdi ki, parlament seçkisi ilə bağlı təmsil etdiyi təşkilat Müsavat və digər müxalifət partiyaları arasında əməkdaşlıq mümkündür. S.Cəlaloğlu vurğuladı ki, vaxtilə Müsavatın ADP və “Ümid”ə qarşı səsləndirdiyi hakimiyyətə işləməklə bağlı ittihamlar, indi onun özünə qarşı yönəlib. Bu baxımdan S.Cəlaloğlu bu cür ittihamlara yol verməməyin tərəfdarıdır: “Mən təklif etmişəm ki, Qarabağ bloku ilə digər müxalifət partiyaları arasında əməkdaşlığın qurulması üçün əlaqələr yaradılsın. Əməkdaşlıq bələdiyyə və parlament seçkiləri ilə bağlı olmalıdır. Seçkilərlə bağlı funksional əməkdaşlıq etmək mümkündür”.
Müsavat Partiyasının Icra Aparatının rəhbəri Arif Hacılı isə bildirdi ki, hələ ki, təmsil etdiyi təşkilatın gündəmində ADP və “Ümid”lə əməkdaşlıq yoxdur: “Hazırda Müsavat Partiyasında bu mövzu müzakirə olunmur. Qeyd olunan partiyalarla əməkdaşlığın yaradılmasına dair Müsavat Partiyasının heç bir üzvü, heç bir təklif irəli sürməyib”.
Xəyal
