Mehman Sadıqov: «Həbsdəki məhbusa işgəncə verilməsi üçün heç kim sifariş verə bilməz»
Elçin Behbudov: «Əli Insanovun hüquqları var və Ədliyyə Nazirliyi işgəncələrlə bağlı səslənən fikirlərə münasibət bildirməlidir»
Dekabrın 17-də 2005-ci ilin oktyabrından həbsdə olan keçmiş səhiyyə naziri Əli Insanov uzun illərdən sonra yenidən məhkəmə qarşısına çıxdı. Bakı Apelyasiya Məhkəməsində Əli Insanovun işi üzrə iki ayrı-ayrı məhkəmə iclasları oldu.
Söhbət, Əli Insanovun 11 il azadlıqdan məhrum edilməsi barədə hökmdən, eləcə də işgəncəyə məruz qalmasıyla əlaqədar Ədliyyə nazirinə və Penitensiar Xidmətə qarşı şikayəti üzrə birinci məhkəmə instansiyasının qərarından verilən apelyasiya şikayətlərilə bağlı məhkəmə iclaslarından gedir.
Ilk olaraq hakim Sənan Hacıyevin sədrliyilə Ədliyyə naziri və Penitensiar Xidmətə qarşı iddia üzrə məhkəmə iclası keçirilib Məhkəmədə cavabdehlərdən Penitensiar Xidmətin nümayəndəsi Ziya Dadaşov iştirak etsə də, Ədliyyə Nazirliyindən heç kim iştirak etməyib.
Əli Insanov buna etiraz edib və ədliyyə naziri Fikrət Məmmədovun məhkəmədə iştirakı barədə vəsatət qaldırıb. “Mənim iddiamın əsasında şəxsən Fikrət Məmmədovun özü durur. O nəyə arxayındır ki, məhkəməyə nəinki özü gəlməyib, heç nümayəndəsini də göndərməyib. Mənə verilən işgəncələrin başında şəxsən onun özü durur, xalası oğlu Ilham Əliyevin tapışırığı əsasında. Ona görə də vəsatət verirəm ki, Fikrət Məmmədov özü gəlsin. Mənim ona çoxlu suallarım var”- deyə Əli Insanov bildirib.
Əli Insanov hazırda məhbus həyatı yaşasa da, vaxtilə ölkənin deputatı, naziri, ictimai xadimi olub. Onun da hüquqları var və ona qarşı hər hansı işgəncələr olubsa araşdırılmalıdır.
Pentensiar Xidmətin ictimaiyyətlə əlaqələr şöbəsinin rəhbəri Mehman Sadıqov qəzetimizə açıqlamasında bildirdi ki, məhkəmədə Pentensiar Xidmətin nümayəndəsi iştirak edirsə, o həm də Ədliyyə Nazirliyini təmsil edir. Mehaman Sadıqov onu da əlavə etdi ki, Əli Insanova işgəncə verilməsi sübut olunmamış iddiadır: “Əli Insanova hansı formada işgəncə verilib, kim işgəncə verib, bu haqda heç bir dəlil yoxdur. Digər tərəfdən, məhkuma işgəncə vermək üçün, heç bir yuxarı orqan sifariş verə bilməz. Bu fikirlərin reallığa uyğunluğu yoxdur”.
Işgəncələr Əleyhinə Komitənin sədri Elçin Behbudov bildirdi ki, Ədliyyə naziri səslənən fikirlərə münasibət bildirməli və Əli Insanovun vəsadətləri təmin olunmalıdır: “Əli Insanov bu gün məhkumluq həyatı yaşayır. Ancaq bu adam ölkədə yüksək vəzifə tutub, alimdir. Eyni zamanda vətəndaşdır və onun da hüquqları var. Mən Əli Insanovla dəfələrlə görüşmüşəm. O zaman da Əli Insanov mənə işgəncələrdən, saxlanma şəraitindən, ona qarşı mənfi münasibətdən danışırdı. Sonradan məni cəzaçəkmə müəssisələrinə buraxmadılar. Hətta Əli Insanov mənimlə görüşə bilmədiyinə görə Avropa Məhkəməsinə müraciət etmişdi. Mən beynəlxalq dərəcəli hüquq müdafiəçisiyəm və Azərbaycanda işgəncələr əleyhinə yeganə komitənin sədriyəm. Mən hesab edirəm ki, Ədliyyə nazirinin nümayəndələri onunla görüşməlidir. Şəxsən Ədliyyə naziri haqqında deyilənlərə aydınlıq gətirməlidir. Əgər heç nə danışmırsa, deməli, deyilənlərlə razıdır. Ədliyyə Nazirliyinin nəzdində ictimai şura yaradıblar və guya həmin şuranın üzvü olmayanlar cəzaçəkmə müəssisəsinə buraxılmır. Əgər belədirsə, niyə Eynulla Fətullayevi hər yerə buraxırlar? Axı o da ictimai şuranın üzvü deyil. Bu məsələlərdə ayrı-seçkiliyə yol verilir və biz də baş verənlərdən tam xəbərdar ola bilmirik. Ancaq əvvəllər Əli Insanovla bağlı bütün məsələləri ictimailəşdirmişəm”.
Hikmət