Fermerlər «Aqrolizinq»in Horadiz filialı rəhbərinin dövlət vəsaitini taladığını iddia edirlər
Füzuli rayonunda yaşayan fermerlər “Aqrolizinq” ASC-nin Horadiz filalında baş verən özbaşınalıqla bağlı ölkə başçısı Ilham Əliyevə müraciət ediblər. Müraciətin bir nüsxəsini də mətbuata göndərən fermerlər iddia edirlər ki, dövlət büdcəsindən “Aqrolizinq” ASC-nin Horadiz filalına 2008-ci ildə 48 ədəd traktor, 36 ədəd taxılyığan kombayn və 120-dən artıq kənd təsərrüfatı maşınları verilib:
“Bu texnikalardan hər il geniş şəkildə istifadə edilib və texnikanın gördüyü işdən əldə olunan gəlirlərdən çox cüzi, yəni bir traktorun gördüyü işin 10 faizi həcmində pul vəsaiti dövlətə ödənilib. Əldə olunan pul vəsaiti (gübrələrin satışı istina olmaqla) rayon bankına yox, baş idarəyə təhvil verilir. Bu olay mənimsəmə üçün əlverişli şəraitdir. Horadiz ”Aqrolizinq” idarəsinin ən çox gəlir gətirdiyi il 2013-cü il olub. Dövlətə əvvəlki illərə nisbətən bu il çox pul keçirilib. Bu təşkilata 2008-ci ildən 2012-ci ilin may ayına kimi Hüseyn Abbasov rəhbərlik edib və o, rayon icra başçısının aqrar məsələləri üzrə müavini təyin edildikdən sonra Horadiz “Aqrolizinq”inə yaxın adamı Fəttah Heydərovu təyin etdirsə də, yenə ora rəhbərlik edir. Hamıya bildirir ki, bu idarə onun özəl təşkilatıdır. Ötən il, statistikaya görə, rayonda 39600 hektar dənli taxıl sahəsi biçilib. Hər bir hektar biçinin dövlət qiyməti 27 manat olmasına baxmayaraq onlar bu işi 30 manatdan yerinə yetiriblər. Biçilən sahənin 70 faizini Horadiz “Aqrolizinq”i yerinə yetirib. Bu da 39600 hektar sahənin 27720 hektarını təşkil etməklə 831 min 600 manat gəlir gətirib. Respublika “Aqrolizinq” ASC-nin Horadiz filalına qoyduğu plan isə 6000 hektar sahənin biçilməsi idi. Dövlətə 180 min manat pul ödənilib. Bu vəsaitin də bir hissəsi mexanizatorlara rəsmiləşdirilmədən əmək haqqı və təmir xərcləri ayrılacaqdır. Qalan 21 min 720 hektar üçün toplanan 651 min 600 manat vəsait “Aqrolizinq” ASC-nin rəhbəri Əli Bayramov və Hüseyn Abbasov mənimsəyiblər. Direktor Fəttah Heydərovun qazancı isə 800 hektar taxıl sahəsinin heç bir ödəniş olmadan əkilməsi və biçdirilməsidir. Bu idarəni maliyyə nazirliyi və korrupsiya idarəsi yoxlasa hər şey üzə çıxar”.
Fermerlər statistik məlumatları da müraciətlərində diqqətə çatdırırlar: “Horadiz ”Aqrolizinq”i 2008-ci ildə 1500, 2009-cu ildə 2300, 2010-cu ildə 3200, 2011-ci ildə 4300, 2012-ci ildə 5200 və 2013-cü ildə isə 6700 hektar sahədə dənli-taxıl bitkisinin əkini və biçini üçün dövlətə pul vəsaitini ödəyib. Halbuki rayon Statistika idarəsinin məlumatına görə, rayonda 2008-ci ildə 37600, 2009-cu ildə 43920, 2010-cu ildə 36650, 2011-ci ildə 37540, 2012-ci ildə 38900 və 2013-cü ildə 39600 hektar sahədə dənli-taxıl bitkisi əkilib və biçilib. Bununla bərabər rayonda hər il 6500 hektara yaxın ərazidə yonca bitkisi əkilib biçilir. Bütün bu işlərin 70%-dən çoxunu Horadiz filialı yerinə yetirir. Bu təşkilata dövlət büdcəsindən verilən mineral gübrələr qışlaqlarında fəaliyyət göstərən fermerlərə yazılmaqla kənar şəxslərə satılır. Respublikaya mineral gübrələrin gətirilməsinə dair lisenziya almış hüquqi və fiziki şəxslərə satılır”.
Məsələylə bağlı Hüseyn Abbasovla əlaqə saxladıq. O fermerlərin qeyd etdiyi məlumatların yalan olduğunu söylədi və bildirdi ki, heç bir yeyinti yoxdur: “Yeyinti necə ola bilər? Bu öz hesabına dolanan müəssisəsdir. Bu mümkün deyil. Hər hansı yeyinti varsa, hüquq mühafizə orqanlarına müraciət etsinlər”.
Hüseyn Abbasov dedi ki, jurnalistlər istənilən vaxt rayona gəlib “Aqrolizinq” ASC-nin Horadiz filialının gördüyü işlərlə maraqlana və ətraflı məlumat əldə edə bilərlər.
Ramin DEKO
