Son zamanlar müxalifətdaxili gərginlik siyasi dairədən kənarda da xeyli məqamlara işıq saldı. Təkcə siyasilər deyil, həm də ictimai sektorda xeyli adam özünün kimliyinə aydınlıq gətirdi. Proses davam edir. Müsahibə verənlər, ittiham edənlər, yol göstərənlər durmadan artır. Biri taktikanın, başqa biri strategiyanın yanlışlığından danışır, digəri Dədə Qorqudluq edir, hamıya ağıl verir. Hələ söyüşü həyatının ayrılmaz hissəsi sayanların, bu məqamda da ənənəsinə sadiq qalmasını demirəm…
Axı kimdir bu adamlar? Keçmişə nəzər salsaq, onlar “mən siyasətə qarışmıram”lar, günümüzdən yanaşsaq, “peşəkar” siyasətçilərdir. Təbii ki, hələlik – müxalifətdaxili münasibətlər qaydaya düşənə kimi… Sonra yenə qayıdacaqlar öz keçmişlərinə…
Hələliksə, müxalifətdaxili münasibətdən doğan istənilən suala cavab almaq üçün onlara müraciət etmək olar. Bir sözlə, çox bic tərpəniblər. Gündəmə gəlmək, hakimiyyətə yarınmaq üçün əla fürsətdir, əldən vermək olmaz. Hakimiyyət dəyərləndirməsə belə…
Baxırsan ki, qalaq-qalaq kitabları var, yüzlərlə məqalə müəllifidir, amma yazdıqlarının içindən ölkədəki real vəziyyəti əks etdirən bir cümlə də tapmaq mümkün deyil. Açığı, yarınmalarına baxmayın, onlar heç hakimiyyətə də lazım deyil. Ən yaxşı halda, belə məqamlarda, yəni, mövsümi istifadə üçün yararlı ola bilərlər. Çünki ilk fürsətdəcə Avropaya qaçan, sonradan orada sığınacaq alan bu fürsətcillər, təbii olaraq, sonrakı oyunlarını müxalifətin zəifliyi üzərində yox, hakimiyyətin repressiyaları, ölkədə yaratdığı vəziyyət üzərində qururlar. Guya, hakimiyyət onlarla sərt davranıb, həyatlarına ciddi təhlükə yaradıb, ölkədə yaşamaları mümkünsüz olub. Avropalılar da həddindən artıq sadəlövhdür, dərhal inanırlar. Xüsusilə də, məsələnin kökündə Azərbaycandakı idarəçilik durursa…
Faktiki çəkişmə tərəfləri olmayan, lakin hakimiyyətə müxalif olduqlarını iddia edən siyasiləri də xeyli aktivləşdirib son günlər baş verənlər. Təəssübkeşlik etmirlər, vəziyyətdən öz maraqlarına uyğun istifadə etmək niyyətindədilər. Amma necə, hansı güclə, hansı ictimai reytinqlə? Bu adamların ən güclü silahı, partiyaların keçmişinə nəzər salmaq, onların keçmişdə yaratdığı blok və birlikləri təftiş etməkdən ibarətdir. Sadəcə, ictimaiyyətə bir xatırlatma… Başqa heç bir gözləntiləri-filan yoxdur. Heç “tutar qatıq, tutmaz ayran” prinsipi də deyil.
Bir sözlə, səmərəsiz işlə məşğul olduqlarına əminlikləri sonsuzdur. Çünki onların girişdiyi bu istiqamət, Azərbaycan hakimiyyətinin daha ciddi məşğul olduğu, milyonlar xərclədiyi ən sevimli fəaliyyət istiqamətidir.
Hakimiyyətin bu istiqamətdə ən möhtəşəm uğuru isə elə sizlərsiniz – müxtəlif zamanlarda, siyasi partlayışlardan qopan, zərərsizləşmiş qəlpələr. Amma hakimiyyət üçün də bu qəlpələrlə işləmək artıq öz əhəmiyyətini itirib. Əsas olan onları qəlpəyə çevirməkdir. Bilirsiz niyə? Ona görə ki, indi təsir etmək istədiyiniz, istiqamət verməyə çalışdığınız Azərbaycan cəmiyyəti onlara özünün adından çıxış etmək mandatı verməyib. Indi siz hakimiyyətin yanında olmasanız belə, əsas hədəfinizin ona qarşı olanlarla baş-başa gəlmək olduğu ortadadır.
Heç nə demirik, bütün çabalarınıza rəğmən, özünüzün, sizdən öncəkilərin durduğu yerə baxın. Görəcəksiniz ki, Azərbaycan cəmiyyətini heç vaxt belə ucuz addımlarla, fürsətcilliklə istiqamətləndirmək mümkün olmayıb.
