«Əli Həsənovun sifarişi əsasında yazılan bu məqalə müəyyən məqsədlərə xidmət edir»
“Bəzi KIV-lərdə, o cümlədən ”Yeni Müsavat”da dərc edilən “YAP-çı deputat Elşad Abdullayevlə şübhəli işbirliyində ittiham olunur” başlıqlı məqalədə mənimlə bağlı yazılanlar həqiqətə uyğun deyil. Əli Həsənovun sifarişi əsasında yazılan bu məqalə müəyyən məqsədlərə xidmət edir”. Bu sözlər fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayevə məxsusdur.
O, deputat Astan Şahverdiyevlə, müğənni Firuzə Ibadova və Rəşad Allahyarov arasındakı torpaq qalmaqalında adının hallandırılmasına münasibət bildirərkən belə deyib.
Elşad Abdullayev bildirib ki, onun bu məsələlərə heç bir aidiyyatı yoxdur: “Məqalədə adları çəkilən insanlara böyük hörmətim var, ancaq onlarla heç vaxt ünsiyyətim və iş birliyim olmayıb”. Elşad Abdullayev hesab edir ki, onun adının bu məsələlərdə hallandırılması qardaşı Mahir Abdullayevin oğurlanması ilə bağlıdır: “Zərərçəkəni – məni susdurmaq istəyirlər. Eyni zamanda məqsəd xüsusilə ağır dövləti cinayəti gizlətməkdir. Hazırda, ABŞ Dövlət Departameninin və Avropa Şurasının hesabatlarında yer alan ”Gülərqeyt” əməliyyatı Apelyasiya Məhkəməsində icraata götürülüb. Məlumdur ki, faktiki olaraq Gülər Əhmədova ağır dövlət cinayəti edib və buna görə də Cinayət Məcəlləsinə görə ağır cinayət məsuliyyəti daşımalıdır. Ramiz Mehdiyev, Gülər Əhmədova beynəlxalq hesabatlarda günahkar şəxslər hesab edilir. Bu önəmli hüquqi faktdır, həmin hesabatlar olduqca ciddi mütəxəssislər tərəfindən hazırlanıb. Lakin Ramiz Mehdiyevi hüquqi məsulliyyətdən yayındırmaq məqsədilə Gülər Əhmədovanın əməli xırda dələduzluq kimi qiymətləndirilir.
Nəzərə alınsa ki, o MTN zabiti Mahir Abdullayevin oğurlanması, Azərbaycan Beynəlxalq Universiteti və deputat seçkiləri ilə əlaqədar Ramiz Mehdiyevin adı ilə mənə qarşı hədə-qorxu gəlib, məni təhdid edib, onun əməlləri xırda dələduzluq cinayəti kimi tövsif oluna bilməz. Həm qardaşımın Ramiz Mehdiyev vasitəsilə geri qaytarılması, həm ABU-nun məndən tələb olunması, həm də deputat seçkiləri ilə bağlı pul tələb etməsi bir-birilə əlaqəli sosial təhlükəli cinayət əməlidir. Indi bütün bunları ört-basdır etmək üçün mənim barədə böhtan xarakterli yazılar dərc etdirirlər”.
