Əvvəlki yazımda müxalifətin mentalitetini dəyişməli olduğu barədə yazmışdım. Mentaliteti dəyişmək üçün ilk növbədə müxalifət öz keçmiş addımlarını, qərarlarını təftiş etməlidir.
1992-93-cü illərdə baş verənlər, həmçinin 1998-ci ildə müxalifətin seçkini boykot qərarı, eləcə də 2003-cü il seçkisi haqda xalqın beynində yaranmış fikirləri dəyişmək vacibdir. Ən əsası, müxalifət dəyişim üçün keçmiş səhvlərini təftiş etməlidir. Bunsuz dəyişib inkişaf etmək mümkün deyil.
Xüsusilə, gənc nəsildə yuxarıda bəhs etdiyim hadisələr barədə məlumatlar çox azdır və ya təhrif olunmuş şəkildədir. 1992-93-cü illər barədə hakimiyyətin təbliğatı öz işini görüb. Bu məsələdə müxalifətin səhvi həm də ondadır ki, hakimiyyətin qara rəngdə göstərmək istədiklərinin ağ rəngdə olduğunu sübut etmək istəyir. Halbuki, həmin dövr səhvləri və düzləri ilə birlikdə təqdim edilsə, xalq da, xüsusilə gənclər də nəyin nə yerdə olduğunu anlayar. Indi isə hər iki tərəf bir-birinin əksi olan fikirləri səsləndirir. Insanlar da heç birinə inanmamağı seçirlər. Çünki bu, ən rahat seçimdir. “Müxalifət də onların tayıdır” – bu, çox geniş yayılmış ifadədir. Bu, xalqa hər iki tərəfin yalan danışmağına görədir. Nəticədə “müdrik” xalq inamını itirir.
1998-ci ildə seçkilərində boykot qərarının niyə verilməsinin əsl səbəbləri açıqlanmalıdır. Elçibəy niyə qayıtdı? Elçibəylə Isa Qəmbər arasında nə baş verir? Heydər Əliyevin baykot qərarında rolu olubmu? Hakimiyyətin hələ çox zəif olduğu, neft pullarının gəlmədiyi, korrupsiyanın səviyyəsinin aşağı olduğu 1998-ci ildə dəyişiklik şansı niyə itirildi? Baş verənlərdə Elçibəyin mənfi rolu nə qədərdir? Bütün bu suallara cavab verilməlidir. Ilk növbədə də Isa Qəmbər tərəfindən cavab verilməlidir.
Eləcə də 2003-cü il hadisələri barədə xalq məlumatlandırılmalıdır. Verilən və verilməyən qərarlar haqda yenə də ilk növbədə Isa Qəmbər danışmalıdır. Düz və səhvliyindən asılı olmayaraq, Isa Qəmbər həmin vaxt bir çox qərarlar verib. Xalqın beynindən “Isa Qəmbər bizi meydanda tək qoydu” fikrini çıxarmaq üçün mütləq bu addım atılmalıdır.
Isa Qəmbər bir çox amilləri nəzərə alaraq bir siyasətçi kimi qərar verib. Mənə görə, səhv qərar idi. Ancaq bu, mənim subyektiv fikrimdir. Bütün hallarda, xalqa hesabat verilməlidir.
Xalqın inamını qaytarmaq lazımdır. Bunun üçünsə xalqa həqiqətlər deyilməlidir.
P.S. Yeni ildən qəzetləri hələ almamışıq. Buna görə informasiya problemi yaşayırıq. Ancaq 13 yanvarda ANS-də AXCP və Müsavat barədə süjet verildi. Süjetdə AXCP və Müsavat fəallarının bir-birini köhnə səhvlərdə ittiham etdiyi qeyd olunurdu. Elə bütün bunların da qarşısını almaq üçün tarixə aydınlıq gətirilməlidir.
Bakı Ağır Cinayətlər Məhkəməsi 15.01.2014
Üzeyir Məmmədli
