Jurnalist 4 ay müddətində 3 dəfə dindirilib
Vəkil Yalçın Imanov Milli Təhlükəsizlik Nazirliyinin (MTN) istintaq təcridxanasında saxlanılan jurnalist və hüquq müdafiəçisi Pərviz Həşimli ilə görüşüb. Y.Imanov bizimyol.info-ya bildirib ki, Pərvizin səhhəti və psixoloji durumunda heç bir dəyişiklik yoxdur: “Psixoloji durumu yaxşı deyil. Əsas səbəb də istintaqın uzanmasıdır. 4 ay müddətində 3 dəfə dindirilib.
Dindirilmələr zamanı da ona ancaq Cinayət Məcəlləsinin 228.2.1-ci maddəsi ilə ittiham üzrə suallar verilib. Cinayət Məcəlləsinin 206.3.2-cı maddəsi ilə bağlı suallar verilməyib”.
Bundan əlavə vəkil bildirib ki, P.Həşimlinin dövlət orqanlarına etdiyi yazılı müraciətlərin heç biri ünvanlarına göndərilməyib: “P.Həşimli 30-a yaxın dövlət orqanına yazılı müracət etdiyini dedi. Lakin heç bir müraciət ünvanına çatmayıb. Buna görə də Pərviz Həşimli mətbuat vasitəsi ilə prezidentə müraciət etmək məcburiyyətində qalıb. O, dövlət başçısından Bakı Istintaq Təcridxanasına köçürülməsi ilə bağlı göstəriş verməsini xahiş edib”.
Vəkil vurğulayıb ki, P.Həşimlini narahat edən digər bir məqam barəsində olan həbs-qətimkan tədbirinin uzadılacağının gözlənilməsidir: “Pərviz Həşimli barəsində seçilmiş həbs qətimkan tədbirinin müddəti fevralın 17-də bitir. Ailəsi ilə görüşə və telefon əlaqəsinə icazə verilməməsi, mətbuatla təmin edilməməsi və Bakı Istintaq Təcridxanasına köçürülməməsindən daha çox onu həbs-qətimkan tədbirinin uzadılacağı narahat edir”.
P.Həşimli sentyabrın 17-də Milli Təhlükəsizlik Nazirliyinin keçirdiyi əməliyyatla saxlanıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı- beş ildən səkkiz ilədək müddətə azadlıqdan məhrum etmə ilə cəzalandırılır) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma – üç ildən beş ilədək müddətə azadlıqdan məhrum etmə ilə cəzalandırılır) maddələri üzrə ittiham irəli sürülüb və barəsində Səbail rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs-qətimkan tədbirinin müddəti 3 ay artırılıb.
P.Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir. “Amnesty International” təşkilatı Pərviz Həşimlini “vicdan məhbusu” kimi tanıyıb.
