Tanınmış amerikalı politoloq Zbiqnev Bzejinski ukraynalı jurnalistə müsahibəsi zamanı Avromaydana müraciət edib.
Müraciətində Bzejinski tarixi nöqteyi nəzərdə vacib iş görən ukraynalıların qəhrəmanlığına heyran olduğu deyib və Avromaydanı effektiv siyasi alət kimi istifadə etməyi tövsiyə edib.
«Maydanın qəhrəman adamlarını salamlayıram. Sizin etdiyiniz siyasi nöqteyi nəzərdən çox vacibdir. İndi bunu effektiv siyasi alətə transformasiya etməlisiniz», – deyə Bzejinski bildirib.
Politoloq əmindir ki, Avropanın bir hissəsi olmaq, eyni zamanda Rusiya ilə dostluq əlaqələrini saxlamaq bütün ukraynalıları birləşdirir. Bu zəmində Bzejinski milli birlik komitəsi yaratmağı və nəticədə konkret liderləri müəyyənləşdirməyi tövsiyə edib.
«Siz təkcə ukraynalılara deyil, bütün dünyaya göstərməlisiniz ki, müstəqillik arzusu, azad Avropa ölkəsi olmaq, eyni zamanda Rusiya ilə dost münasibətdə olmaq istəyi hamınızı birləşdirən amildir. Konkret liderlərinizi müəyyən etməlisiniz. Səsləndirdiyiniz tezislər Kiyevdə, Vaşinqtonda, Berlində yaxud Moskvada insanları narahat edən məsələləri əks etdirməlidir – yeni nəsil Avropanın bir hissəsi olan (Rusiya da Avropanın bir hissəsidir) müstəqil Ukraynada yaşamaq istəyir. İşinizin nəticəsinin olması üçün konkret liderləriniz olmalıdır», – deyə amerikalı politoloq bildirib.
azadlıq.info
