Deputatlar AvroNest-in iclasına gedir
Yanvarın 22-də Brüsseldə AvroNest-in iqtisadiyyat komissiyasının iclası keçiriləcək. Modern.az saytı xəbər verir ki, həmin iclasda Azərbaycan Milli Məclisinin deputatları da iştirak edəcəklər.
Ötən il oktyabrın 9-da keçirilən prezident seçkilərinin nəticələri ilə bağlı Avropa Parlamentinin qətnaməsi AvroNest-lə Azərbaycanın bu qurumdakı nümayəndə heyəti arasında müəyyən narazılıq yaranmışdı. AvroNest-dəki nümayəndə heyətinin rəhbəri Elxan Süleymanov hətta Azərbaycanın bu qurumdan çıxacağını istisna etmirdi.
Bundan sonra Elxan Süleymanov Avropa Parlamentinin prezidenti Martin Şultsa, ATƏT sədri Leonid Kocaraya, Avropa Şurasının prezidenti Can Klod Minyona, ATƏT PA prezidenti Ranko Krivokapiçə, AvroNest PA-nın həmprezidentlərinə Prezidentlər Konfransının üzvlərinə və Avropa Parlamentinin bütün üzvlərinə müraciət ünvanlamışdı. “Azərbaycan nümayəndə heyəti Avropa Parlamentinin öz müşahidə missiyasının nüfuzuna ciddi zərbə vuran, təxribat və iğtişaşlara sövq edən 23 oktyabr 2013-cü il tarixli qətnaməsinin 32-ci bəndini qətiyyətlə rədd edir və araşdırmalar aparılıb müvafiq tədbirlər görülməyənə qədər bu qurumun yaratdığı Avronest PA-da fəaliyyətini dayandırmaq məcburiyyətində qalır”, – deyə həmin müraciətin sonunda bildirilirdi.
