Ekspertlər Ərdoğanın «korrupsiya qalmaqalından ziyan çəkmədik» fikrini real saymır
Samir Əliyev: «Korrupsiyada adı hallanan insanların biznes strukturlarına kifayət qədər yaxın olması iqtisadiyyata da ciddi təsir edir»
Türkiyə iqtisadiyyatı korrupsiya qalmaqalından ziyan çəkmir. “Trend”in “Milliyyət” qəzetinə istinadən verdiyi xəbərə görə, bunu Türkiyənin Baş naziri Rəcəb Tayyib Ərdoğan bəyan edib. Onun sözlərinə görə, ölkə iqtisadiyyatını heç nə zəiflədə bilməz. Baş nazir qeyd edib ki, Türkiyə iqtisadiyyatı möhkəm əsaslar üzərində qurulub və nə Gəzi parkındakı hadisələr, nə də korrupsiya qalmaqalı ona təsir göstərmir.
Ərdoğanın bu açıqlaması bir müddət əvvəl Türkiyənin baş nazirinin müavini Bülənt Arınçın səsləndirdiyi fikirlərlə üst-üstə düşmür. Baş nazirin müavini Türkiyə iqtisadiyyatına korrupsiya qalmaqalından 100 mlrd dollar ziyan dəydiyini bəyan etmişdi. “Mən deyə bilərəm ki, Türkiyədə son hadisələri qızışdıran şəxslər hökumətə tələ qururlar və bu səbəbdən müəyyən itkilər var. Mən 100 mlrd dolları ötüb keçmiş ziyanı nəzərdə tuturam”,- deyə o bildirib.
Arınç qeyd edib ki, yaxın zamanda hökumət üzvləri bu məsələ ilə bağlı açıqlamalar verəcək: “Gəlin sabahdan iqtisadiyyat və maliyyə sahələrinə cavabdeh olan nazirlərin çıxışlarına nəzər salaq”,- deyə o əlavə edib.
Son aylarda qalmaqallardan başı açılmayan Ərdoğan hökumətinin üzləşdiyi növbəti problemin əslində ölkə iqtisadiyyatına hansı təsirləri olub?
Iqtisadçı-ekspert Samir Əliyev Türkiyədə son aylar yaranmış siyasi böhran nəticəsində türk lirəsinin getdikcə ucuzlaşdığını deyir. Türkiyə Mərkəzi Bankı lirəni lazımi səviyyədə saxlamaq üçün dövriyyəyə əlavə pul buraxır. Amma bu da kifayət etmir. Dollar ayrı-ayrı ölkələrin valyutalarına nisbətdə ucuzlaşsa da, türk lirəsi dollara nisbətdə ucuzlaşır. Bu da siyasi böhranın iqtisadiyyata vurduğu zərərin nəticəsidir.
Ekspertin sözlərinə görə, Türkiyə iqtisadiyyatı Azərbaycan iqtisadiyyatından nə qədər güclü olsa da, korrupsiyada adı hallanan insanların biznes strukturlarına kifayət qədər yaxın olması iqtisadiyyata da ciddi təsir edir. Artıq bu təsir gözünü göstərməkdədir: “Ərdoğan hökumətinin atdığı addımlar iqtisadiyyata müsbət təsir edib. Ancaq Türkiyədə bir qayda olaraq siyasətin iqtisadiyyata təsiri daha çoxdur. Artıq siyasi böhranın iqtisadi böhranla davam edəcəyi ilə bağlı narahatçılıqlar var. Hər halda bu hadisələr ölkəyə zərərsiz ötüşməyəcək”.
Fizzə
