Mirvari Qəhrəmanlı: «Azəriqaz»da da islahatlara hazırlaşırlar və artıq bir çox idarələrdə fəhlələr də ixtisar edilir»
“Azadlıq”ın ötən saylarından birində Dövlət Neft Şirkətinin daha 1500 nəfəri işsiz qoyduğu barədə məlumat dərc olunmuşdu. Neftçilərin Hüquqlarını Müdafiə Komitəsinin sədri Mirvari Qəhrəmanlıya istinadən yayılan bu məlumatda şirkətin Geofizika və Geologiya Idarəsində baş verənlərdən söhbət gedirdi.
Adıçəkilən idarənin rəisi V.Abdullayev sözügedən məlumatla əlaqədar “Azadlıq”a məktub göndərərək, yazılanlarla razılaşmadığını bildirir. Bununla belə, rəhbərlik etdiyi qurumda ixtisarları da təsdiqləyir.
Idarə rəisi yazır ki, bu qurumda işçilərin sayı heç 1500 nəfər azdır. Belə olan halda, 1500 nəfər necə işsiz qala bilər?
“ARDNŞ-in sözügedən idarəsinin strukturunda Kompleks Geoloji Kəşfiyyat və Topoqrafiya Idarəsi adlı təşkilat yoxdur. Ixtisarların məqsədi isə ikipilləli idarəetmə sistemindən birpilləli idarəetmə sisteminə keçidlə idarəetmədə operativliyi təmin etməkdir. Ixtisar olunan işçilərin işlə təmin olunması imkanlarının araşdırılması üçün Dövlət Neft Şirkətinin Insan Resursları Departamentinə müraciət olunub və bu işçilər yeni iş yeri və vakansiya yarananda işlə təmin olunacaqlar”, – deyə məktubda qeyd olunub.
Mirvari Qəhrəmanlı isə dediklərinin üzərində dayanır. Dövlət Neft Şirkətinin 15 idarəsində ciddi struktur ixtisarları aparılaraq ləğv olunduğunu deyən hüquq müdafiəçisinin sözlərinə görə, kompleks qazma işləri trestinin tərkibində 7 idarə, magistral neft kəmərlər idarəsinin tərkibində 4 idarə və digər idarələrin tərkibində 3 istehsalat və 1 servis idarəsi ləğv olunub. Bununla yanaşı, “Azəriqaz”da da islahatlara hazırlaşırlar və artıq bir çox idarələrdə fəhlələr belə, ixtisar edilir: “ARDNŞ mənim dediklərimi düzgün hesab etmirsə, onda neçə işçisinin ixtisara düşdüyünü söyləsin. Şirkətdə ciddi struktur işi gedir, idarələr ləğv olunur. Işçilərə maaşlarının 5 mislini verib ərizə yazdırırlar ki, guya, işçi özü işdən çıxır. Bununla da sayın az olmasına çalışırlar. Qurumun üç istehsalat müəssisəsi, kəşfiyyat, Geofizika, Mədən-geofizika və Kompleks Geologi Kəşfiyyat Topoqrafiya idarəsi, bir elmi-tədqiqat institutu və bir servis qurumu var. Bu idarələrin adları necə olmaya bilər? Belə çıxır ki, şirkətin saytına yalan məlumat yerləşdirilib?”
Sözügedən məsələləri bir daha aydınlaşdırmaq üçün ARDNŞ mətbuat xidmətilə dünən gün ərzində dəfələrlə əlaqə saxlamağa cəhd göstərsək də, bu qurumda telefonun dəstəyini qaldırmağa bir nəfər tapılmadı.
Informasiya şöbəsi
