Musavat partiyası başqanının müşaviri Yadigar Sadıqlı haqqında bu gün Lənkəran rayon məhkəməsinin çıxardığı qanunsuz qərarla bağlı Demokratik Qüvvələrin Milli Şurası etiraz bəyanatı ilə çıxış edib. Bəyanatda deyilir:
“Bu gün Lənkəran Rayon Məhkəməsinin qərarı ilə Müsavat Partiyası başqanının müşaviri Yadigar Sadıqlı 6 il müddətinə azadlıqdan məhrum edilib. Milli Şura olaraq məhkəmənin qərarını qətiyyətlə pisləyirik. Hesab edirik ki, bu addım hüquqa və məntiqə ziddir. 09 oktyabr seçkilərini saxtalaşdıraraq hakimiyyəti zəbt etmiş mövcud iqtidar öz rəqiblərindən qisas almaq üçün insanları şərləmək və həbsə atmaq siyasətini davam etdirir. Məqsəd insanların gözünü qorxutmaq, onları siyasi fəaliyyətlə məşğul olmaqdan çəkindirməkdir. Milli Şura hesab edir ki, Yadigar Sadıqlının qanunsuz həbsi fərqli siyasi düşüncəyə malik insanlara qarşı aparılan repressiyanın tərkib hissə olmaqla yanaşı onun haqqında çıxarılan bu günkü məhkəmə hökmü də absurd və külüncdür. Bu qərar Azərbaycan məhkəmələrində hüquq nihilzimin baş alıb getdiyini göstərir. Eyni zamanda, bu gün Lənkəranda çıxarılan qanunsuz hökm Azərbaycanda məhkəmə sisteminin icra hakimiyyətinin əlavəsinə çevrildiyinin əyani təzahürüdür. Yalnız siyasi sifarişlə işləyən məhkəmə Yadigar Sadıqlı kimi qurama ittihamla həbsə alınmış bir şəxs haqqında belə cəfəng bir qərar çıxara bilərdi. Bu hökm bir daha təsdiq etdi ki, Azərbaycan məhkəmələri ədalət mühakiməsindən daha çox represiya funksiyasını yerinə yetirir.
Milli Şura Yadigar Sadıqlı başda olmaqla qanunsuz həbsdə olan bütün siyasi məhbusların dərhal və qeyd şərtsiz azadlığa buraxılmasını bir daha tələb edir”.
