Müdafiə naziri Səfərbərlik və Hərbi Xidmətə Çağırış üzrə Dövlət Xidmətinin fəaliyyətinə kölgə salan əmr imzalayıb
Azərbaycanda hərbi xidmətə çağırılan gənclərin sağlamlıq vəziyyəti tibbi komissiyalar tərəfindən təkrarən yoxlanılacaq. Müdafiə Nazirliyinin yaydığı məlumatda bildirilir ki, müdafiə naziri general-polkovnik Zakir Həsənovun əmrinə əsasən, Müdafiə Nazirliyinin tabeliyində olan hərbi hissələrə hərbi xidmətə çağırılan gənclərin sağlamlıq vəziyyəti Silahlı Qüvvələrin birliklərində, Əlahiddə Ümumqoşun Ordusu və Bakı qarnizonu üzrə toplanış məntəqəsində yaradılmış tibbi komissiyalar tərəfindən təkrarən yoxlanışdan keçiriləcək. Xəstəlik aşkar edilən çağırışçılar geri qaytarılacaq.
Zakir Həsənovun bu əmri Səfərbərlik və Hərbi Xidmətə Çağırış üzrə Dövlət Xidmətinə yönəlik addım hesab edilə bilər. Müdafiə naziri bu əmrilə faktiki olaraq adıçəkilən xidmətin fəaliyyətinə kölgə salıb. Bəzi ehtimallara görə, Zakir Həsənova əsgərliyə aparılanlar arasında hərbi xidmətə yararsızların da olduğu barədə faktlar təqdim edilib. Müdafiə naziri həmin əsgərlərin başına bir iş gələcəyi təqdirdə məsuliyyətin onun üzərində qalacağını düşünüb. Və çağırışçıların yenidən tibbi müayinədən keçirilməsi barədə əmr verib.
Başqa versiyaya görə, bu sadəcə Səfərbərlik və Hərbi Xidmətə Çağırış Dövlət Xidməti ilə Müdafiə Nazirliyi arasındakı ziddiyyətlərin təzahürüdür. Bu xidmət əvvəllər Respublika Baş Hərbi Komissarlığı adı altında Müdafiə Nazirliyinin tabeliyində olub. Səfər Əbiyevlə komissarlığın rəhbəri Əliağa Hüseynov arasında həmin çağırış məsələsinə görə ziddiyyətlər yaşanıb. Nəhayət, Səfər Əbiyev Əliağa Hüseynovun tutduğu vəzifədən uzaqlaşqdırılmasına nail oldu. Lakin çox keçmədi ki, çağırış sahəsi Müdafiə Nazirliyinin nəzarətindən çıxarıldı. Ehtimal olunur ki, Zakir Həsənov yenidən çağırış sahəsini Müdafiə Nazirliyinin tabeliyinə verilməsini istəyir. Bu baxımdan da Səfərbərlik və Hərbi Xidmətə Çağırış Dövlət Xidmətinin fəaliyyətinə kölgə salan addımlar atır. Əgər yoxlamalar zamanı hərbi xidmətə yararsız olanların da əsgərliyə aparıldığı üzə çıxsa, bu Səfərbərlik və Hərbi Xidmətə Çağırış Dövlət Xidmətinin rəhbərliyinə böyük zərbə olacaq.
