Bakı şəhər Icra Hakimiyyəti Yasamal ərazisində obyekt tikintisi üçün nəzərdə tutulan əraziləri geri alıb
Yasamal rayonu ərazisində bir neçə yerdə belə bir elana rast gələ bilərsiz: “Qanunsuz zəbt olunmuş ərazi Bakı Şəhər Icra Hakimiyyəti tərəfindən sökülmüş və abadlaşdırılır”. Əvvəllər yaşıllıq sahələr olan, sonradan hasara alınaraq obyektlərin tikilməsi nəzərdə tutulan həmin ünvanlar əvvəlki vəziyyətə qaytarılıb.
Yuxarıda qeyd etdiyimiz elan vurulmuş bir neçə yerə dünən baş çəkdik. Yasamal Rayon Icra Hakimiyyətinin yaxınlığında – Mətbuat prospektində yerləşən binaların qarşısındakı parklar qismən də olsa, əvvəlki vəziyyətinə gətirilib. Sakinlərlə söhbət zamanı məlum oldu ki, bir müddət öncə tanımadıqları şəxslər uşaqların əyləncə yeri olan bu əraziləri hasara alıblar. Vətəndaşlar bunun səbəbini soruşduqda “parkı abadlaşdırırıq” cavabını alıblar.
“Biz də sevindik, dedik ki, park daha yaxşı olacaq. Uşaqların əylənməsi üçün yelləncəklər quraşdırılacaq. Ancaq vaxt keçsə də, orada hər hansı abadlığın, yaxud da tikintinin şahidi olmadıq. Yoldan ötənlər, binada yaşayanlar, təmir olunacaq deyə zibilləri bura atırdılar. Bir müddət sonra ərazi hasara alındı. Hasardan baxanda içəridə iş getdiyi görünürdü. Əmin idik ki, nəsə tikilir, ancaq park salınmır. Buna etiraz etdik. Bakı Şəhər Icra Hakimiyyətinə və digər dövlət qurumlarına müraciət etdik. Sağ olsunlar, müraciətimizə tez cavab verdilər. Parkı əvvəlki vəziyyətinə qaytardılar. Düzdür, burada əvvəllər oturmaq üçün skamyalar var idi, indi yoxdur. Bunu da etsələr, yaxşı olar. Çünki uşaqlar çəmənlikdə otururlar”, – deyə sakinlər bildirdilər.
Sakinlərilə söhbətləşdiyimiz ünvandan bir qədər irəlidə – Yasamal Rayon Icra Hakimiyyəti binasının təxminən 200 metrliyində yerləşən daha bir ərazidə də yuxarıda qeyd etdiyimiz elan var. Iki binanın arasında yenidən salınan parkın ərazisini də bir müddət əvvəl hasara alıblarmış. Buranın da sakinləri eyni problemlə üzləşiblər. Ancaq qonşularından fərqli olaraq, bu parkı bir gecənin içində yaradıblar.
Növbəti elan yenə Mətbuat prospektində, Bakı Dövlət Universitetinin arxasında yerləşən parkda yerləşdirilib. Bu ərazi yaxın zamanlara qədər çay evi kimi fəaliyyət göstərib. Parkın qalan hissəsində isə ağaclar qırılıb, yerində iaşə obyektləri tikiləcəkmiş. Ancaq sonradan plan alt-üst olub, həmin ərazi yenidən öncəki vəziyyətinə qaytarılıb.
Yəqin ki, bu cür elanlara dünyanın heç bir yerində rast gəlmək olmaz. Hətta mübahisəli yerlər olanda belə, problem məhkəmə vasitəsilə yoluna qoyulur. Daha “Qanunsuz zəbt olunmuş ərazi Bakı Şəhər Icra Hakimiyyəti tərəfindən sökülmüş və abadlaşdırılır” kimi elanlar yerləşdirilmir.
Müşahidə etdiklərimiz Yasamal Rayon Icra Hakimiyyətinin başçısı Ibrahim Mehdiyevlə Bakı şəhər Icra Hakimiyyətinin başçısı Hacıbala Abutalıbov arasında qarşıdurma olması barədə yayılan xəbərlərin doğru olduğunu düşünməyə əsas yaradır. Yoxsa, “zəbt olunmuş ərazilərin Bakı şəhər Icra Hakimiyyəti tərəfindən abadlaşdırılması” elanına nə ehtiyac vardı? Yaxud şəhərin gözəgəlimli yerlərindəki əraziləri kim zəbt edib? Sıravi vətəndaşın bu cür geniş əraziləri zəbt etməsi mümkün deyil. Deməli, məsələ başqadır.
Üstəlik, elanlar yuxarıda da qeyd etdiyimiz kimi, Yasamal Rayon Icra Hakimiyyəti binasının yaxınlığındadır. Mümkün deyil ki, ərazidəki “zəbt olunmuş yerlərdən”, söküntü-tikintidən icra hakimiyyətinin xəbəri olmasın.
Ramin DEKO
