İlqar Tağıyev: «Sadəcə, bu qətldə maraqlı olan müəyyən adamlara görə iş ört-basdır edilib»
Cinayət işi üzrə icraatın dayandırılmasına görə Baş prokuror ictimaiyyətə cavab verməlidir
“Azadlıq”ın ötən saylarından birində xəbər vermişdik ki, yazıçı-publisist Rafiq Tağının qətlilə bağlı cinayət işi üzrə icraat dayandırılıb. Rafiq Tağının ailəsinin hüquqlarını müdafiə edən vəkil Elçin Sadıqov bildirib ki, qərarı əldə edəndən sonra ondan məhkəməyə şikayət edəcək. Vəkil qeyd edib ki, şikayəti yerli məhkəmələrdə təmin olunmasa, bu işi Avropa Məhkəməsi müstəvisinə çıxaracaq.
Xatırladaq ki, Rafiq Tağı 2011-ci il noyabrın 19-da Bakıda bıçaqlanıb və aldığı xəsarətlərdən noyabrın 23-də vəfat edib. Bu işin istintaqını Baş Prokurorluğun Ağır Cinayətlərə Dair Işlər üzrə Istintaq Idarəsi aparıb.
Hüquqşünas Müzəffər Baxışov deyir ki, iş üzrə istintaqın dayandırılması Cinayət Prosessual Məcəllənin mahiyyətinə uyğun deyil və işin ictimai əhəmiyyət kəsb etməsi baxımından çox təhlükəlidir: “Cinayət Prosessual Məcəllənin 218.11-ci maddəsinin tələblərinə görə, açılmamış cinayət hadisəsi haqqında cinayət işinin ibtidai istintaq müddəti Baş Prokurorluq tərəfindən uzadıla bilər. Lakin açıldıqdan sonra 218.8 və 218.9-cu maddələrin tələblərinə riayət etməklə yalnız bir dəfə uzadıla bilər. Rafiq Tağının qətli kimi cəmiyyətin diqqətində olan bir iş üzrə icraatın dayandırılması məsuliyyətsiz qərardır. Baş prokuror belə bir məsuliyyətsiz qərarı qüvvədə saxlasa, o, ictimaiyyətə cavab verməlidir. Hesab edirəm ki, bu iş üzrə icraat təzələnməli və istintaq əməliyyat fəaliyyətinə başlamalıdır”.
Baş Prokurorluğun Rafiq Tağının ölümü ilə bağlı başlanmış cinayət işinə dair verdiyi açıqlamadaÿ bildirilir ki, qətllə bağlı irəli sürülmüş fərziyyələrin yoxlanılması istiqamətində mümkün olan bütün addımlar atılıb, əməliyyat tədbirləri yerinə yetirilib, lakin cinayəti törətməkdə təqsirli bilinən şəxs müəyyən edilməyib. Ona görə də iş üzrə icraat dayandırılıb.
Mərhumun qardaşı Ilqar Tağıyev isə Baş Prokurorluğun qərarı ilə barışmayacaqlarını bildirib: “Artıq prokurorluğa müraciət etməyin bir mənası olmadığını bilirik. Nə zaman aidiyyəti qurumla əlaqə saxlayıb, işlə maraqlanırdıqsa, bizə istintaqın davam etdiyi barədə şablon, ümumi cavab verirdilər. Görün, qardaşımın qətlindən nə qədər vaxt keçib, amma onun qatilləri hələ də tapılmayıb. Indi qardaşımı öldürən şəxsin müəyyənləşdirilmədiyini bəhanə edərək, onun qətlilə bağlı cinayət işi üzrə icraatı dayandırıblar. Amma biz bu qərarla razılaşan deyilik. Qardaşımın qatilinin tapılması üçün Avropa Məhkəməsinə qədər gedib çıxacağıq. Aydın məsələdir ki, Azərbaycanın aidiyyəti orqanları Rafiq Tağının qətli üzrə cinayət işinə barmaqarası baxır. Əslində, prokurorluq qardaşımın cinayət işini lap əvvəldən bağlayıb, sadəcə, rəsmi məlumatı indi açıqlanıb”.
Ilqar Tağıyev onu da qeyd edir ki, istintaqın gedişinin sürətləndirilməsi, konkret nəticə əldə olunması üçün dəfələrlə dövlət başçısına müraciət olunub. Lakin bu müraciətlərin heç bir nəticəsi olmayıb: “Faktiki, Rafiq Tağının qətlinin üstünün açılması üçün prokurorluq heç bir iş aparmırdı. Rafiq Tağının qətlinin müəmmalı qalmasında maraqlı olan qüvvələr var. Yalan görüntü yaratdılar ki, guya, nə isə iş görüb araşdırma aparırlar, amma tapa bilmirlər. Bütün bunlar onu göstərir ki, Rafiq Tağının ölümü təşkil olunmuş cinayətdir”.
Mərhum yazıçının qardaşı istisna etməyib ki, prokurorluq cinayətkarların kimliyi barədə ipucları və ya müəyyən məlumatlar əldə edib, amma onları gizlədir. Istintaq materiallarını başdan-ayağa izləmək imkanları olmadığını deyən Tağıyevin sözlərinə görə, hər şey onların vicdanına qalıb: “Biz onsuz da bilirik ki, Rafiqin qatili tapılıb. Sadəcə, bu qətldə maraqlı olmuş müəyyən adamlara görə iş ört-basdır edilib. Inanmıram ki, ortada bu qədər faktlar, sübutlar ola-ola bir qatili tapmaq prokurorluq üçün bu qədər çətin olsun”.
Informasiya şöbəsi
