Özbəkistan XİN rəhbəri Abduləziz Kamilov İsveçrə polisini Gülnarə Kərimovanın Cenevrədəki evini mühafizəsini dayandırmağa çağırıb
Özbəkistan prezidentinin qızı Gülnarə Kərimova bu dəfə atasının hakimiyyətinin xarici işlər nazirinə hücuma keçib.
Virtualaz.org saytı Orta Asiya qaynaqlarına istinadən xəbər verir ki, buna səbəb xarici işlər nazirinin İsveçrə polisinə göndərdiyi sorğudur. Sorğuda İsveçrə diplomatik polisinin Gülnarə Kərimovanın Cenevrədəki villasının mühafizəsini dayandırması tələb olunur. Xarici işlər naziri İsveçrə polisinin nəzərinə çatdırır ki, G.Kərimova artıq diplomatik toxunulmazlığa malik deyil.
Bu faktı G.Kərimova özünün twitter bloqunda açıqlayıb. G.Kərimova yazıb ki, xarici işlər naziri İsveçrənin diplomatik polisinə onun evinin mühafizəsinin nə dərəcədə qanuni olduğuna dair sorğu göndərib.
“Bu gün Özbəkistan xarici işlər naziri Kamilovun adından Milli Təhlükəsizlik Xidmətinin əməkdaşları vasitəsilə Cenevrənin diplomatik polisinə təxribatçı sorğu daxil olub. Sorğuda mənim Cenevrədəki evimin mühafizəsinin qanuniliyi şübhə altına alınır və “diplomatik xarakterli” belə eyham vurulur ki, polis nə vaxt evi tərk edəcək. Özbaşınalıqdır!” – deyə prezidentin qızı yazıb.
Xəbər verildiyi kimi, dekabr ayında mühacirətdə olan özbək hüquq müdafiəçisi Səfər Bekjan və daha bir neçə müxalifətçi G.Kərimovanın evini zəbt ediblər. Təxminən bir həftə sonra İsveçrə polisi və G.Kərimova ilə müqaviləsi olan özəl mühafizə şirkətinin əməkdaşları müxalifətçiləri evdən döyüb qovublar.
G.Kərimova yazır ki, onun evinin açarının dublikatını “saxta hüquq müdafiəçisinə” MTX əməkdaşları verib. Açarla birlikdə Səfər Bekjana evin siqnalizasiya sisteminin ancaq Özbəkistan prezidentinin mühafizə xidmətinin əməkdaşı Denis Makarova məlum olan kodunu da veriblər. Məqsəd isə onu gözdən salmaq olub.
G.Kərimova qisas olaraq xarici işlər naziri barədə kompromatları açıb. Onun bildirdiyinə görə, Abduləziz Kamilovun iki pasportu var – Rusiya və Özbəkistan.
“Bəs Kamilovun yaxınları haradadır? Qardaşı hələ müstəqilliyin ilk illərindən İsveçrədə işləyən Bəxtiyar Kamilov? Nazir Kamilovun oğlu “Qazprombank”da işləyirdi və qaçıb xeyli müddət İsveçrədə gizlənmişdi. Öz oğurluğunun nəticəsində…” – deyə G.Kərimova yazır.
G.Kərimova bildirir ki, nazirin oğlu Daniyarın bankda oğurluq əməli üzə çıxandan sonra İsveçrəyə qaçıb. Onun da ikili vətəndaşlığı var, baxmayaraq ki, Özbəkistan qanunlarına görə, bu, qadağandır.
