Eks-spiker, hazırda ABŞ-da yaşayan Rəsul Quliyevlə onun Londonda yaşayan bacısı oğlu Ilqar Quliyev arasında insident yaşanır. Hətta buna görə eks-spiker qardaşı oğlunu bir neçə dəfə məhkəməyə də verib.
“Axar.az”ın məlumatına görə, Rəsul Quliyevlə Londonda yaşayan bacısı oğlu Ilqar Quliyev arasında uzun müddətdir ki, həllini tapmayan münaqişənin kökü illər öncəyə dayanır. 1996-ci ildə ölkə rəhbərliyi ilə dayısı Rəsul Quliyevin arasında yaşanan narazılıqlardan sonra Ilqar Quliyev və ailəsi Azərbaycanı tərk edib. Londonda məskunlaşan və biznes fəaliyyəti ilə məşğul olan Ilqar Quliyevlə Rəsul Quliyevin münasibətlərinin kəskinləşməsi və məhkəmə çəkişməsinin tarixi də həmin dövrdən başlayıb.
Eks-spiker müəllif hüquqlarının pozulması maddəsi ilə Ilqar Quliyev və onun təmsil etdiyi “Azadan.tripod.com” saytını Amerikada məhkəməyə verib. Məhkəmənin hakimi isə yetərli sənədlərin olmamasını, Böyük Britaniya Birləşmiş Krallığı ilə Amerika Birləşmiş Ştatları arasında hüquqi proseduraların uzun çəkdiyini əsas gətirərək, əvvəlcə məhkəməni təxirə salıb, sonra da dəlil yetərsizliyindən şikayəti xətm edib.
Məlumatda o da qeyd olunur ki, 2000-ci ilin ortalarına qədər Ilqar Quliyevin, ondan sonra da oğlu Ilkin Quliyevin Böyük Britaniyada bir neçə şirkəti olub. Hazırda Londonda məskunlaşan 57 yaşlı Ilqar Quliyev demək olar ki, bütün biznesini 27 yaşlı oğlunun idarəsinə verib. Rəsul Quliyevin onu məhkəməyə verməsi isə bir neçə il əvvəl o, hələ şirkət sahibi olan dövrdə baş verib. Bu isə Rəsul Quliyevlə Ilqar Quliyev arasında yaşanan insidentin müəllif hüquqlarının pozulması müstəvisində olmadığına eyham vurur. Ehtimal edilir ki, eks-spikerlə qohumu arasında illərdi həllini tapmayan münaqişəyə əsas səbəb Londonda Ilqar Quliyevin adına olan şirkətlərdir. Mənbə bildirir ki, həmin şirkətlərin və ümumiyyətlə, Quliyevlər ailəsinin biznes uğurlarının əsas səbəbkarı olduğu deyilən Rəsul Quliyev mühacirət edəndən sonra qohumlarının adına sənədləşdirilən əmlakdan pay gözləyib. Əvəzində isə qardaşı oğlu bu istəyi geri çevirib və bütün əmlakını öz oğlunun adına keçirməklə, Rəsul Quliyevdən gözlənilən bütün hüquqi addımların qarşısına birdəfəlik sipər çəkib.
Rəsul Quliyev Ilqar Quliyevlə hər hansı məhkəmə davasının olmadığını bildirib.
“Mənim qohumlarımla davamın düşməsi və məhkəmə araşdırmasında olmağım ağ yalandır. Ümumiyyətlə, nəinki qohumlarım, hətta başqa bir kiminləsə ömrüm boyu heç vaxt məhkəmə davasında olmamışam, yeganə hökümətin mənim hüquqlarımı pozması məsələsindən başqa”,- R.Quliyev bildirib.
Azpolitika.info olayla bağlı maraqlı məlumat yayıb. Sayt yazır ki, Ilqar Quliyev ailəsiylə birlikdə Londona köçəndən sonra da dayısı ilə birlikdə olub və onun işlərinə kömək edib. Hətta 2005-ci ildə R.Quliyev Azərbaycana dönməyə cəhd edərkən təyyarədə I.Quliyev də olub. Lakin bu cəhd baş tutmayandan, ümumiyyətlə, R.Quliyevin hakimiyyətə gələcəyinə inam sarsılandan sonra bacısı oğlu R.Quliyevdən uzaqlaşıb. 2007-ci ilin sonlarından isə I.Quliyev və qardaşları ilə R.Quliyevin münasibətlərində gərginlik düşmənçilik səviyyəsinədək yüksəlib. Hətta R.Quliyevin şikayəti əsasında Daxili Işlər Nazirliyi eks-spikerin bacısı oğlu Elbrus Quliyevi həbs edib.
R.Quliyevlə bacısı oğlanlarının çəkişməsinin kökündə isə əmlak və biznes mübahisələri durur. Bizdə olan məlumata görə, R.Quliyevin Bakıda vaxtilə aldığı əmlakların əksəriyyəti Ilqar Quliyevin və digər bacısı uşaqlarının adına sənədləşdirilib. Bundan başqa, I.Quliyev parlament sədrinin köməkçisi olduğu vaxt dayısından xəbərsiz də çoxlu sayda əmlak ələ keçirib. Dəqiqləşmiş məlumata görə, hazırda Ilqar Quliyev və qardaşlarının adına təkcə Içəri Şəhərdə 25 əmlak qeydiyyatdadır. Ümumi dəyəri 10 milyonlarla ölçülən bu əmlakların hansının Rəsul Quliyevə, hansının bacısı oğlanlarına məxsus olduğunu isə heç tərəflərin özləri də yaxşı bilmirlər. Elə mübahisə də bunun aydınlaşdırılması zamanı başlayıb.
R.Quliyevə məxsus olduğu bildirilən Içəri Şəhər, Kiçik Qala küçəsi 128 ünvanında yerləşən tikilidə əvvəllər “Bakı-Xəbər” qəzetinin redaksiyası yerləşib. O zaman qəzet R.Quliyevin sponsorluğu ilə işıq üzü görür və onun ideyalarını təbliğ edirdi. Qəzet R.Quliyevlə yollarını ayırandan sonra redaksiyanın yerləşdiyi obyektin hüquqi sahibi, sabiq spikerin bacısının əri Idris Quliyev oranı özü istədiyi kimi icarəyə vermək niyyətinə düşdü. O, hətta həmin obyektdə yerləşən Açıq Cəmiyyət Partiyasını oradan çıxarmaq istəsə də, məhkəmə R.Quliyevin xeyrinə qərar çıxarıb. Yəni R.Quliyevin liderlik etdiyi ACP məhkəmə qərarı ilə tərk etdiyi qərargaha qayıdıb. R.Quliyev o zaman qohumunun mülklə bağlı iddialarına cavab olaraq bildirmişdi ki, yeznəsi Bakıya gələndə olduqca kasıb olub və sonradan onun hesabına var-dövlətə sahiblənib. Buna baxmayaraq R.Quliyevin bacısı uşaqları sabiq spikerin partiyasını Içəri Şəhərdə yerləşdiyi qərargahdan da çıxarıblar. Bu mülk də sənəd üzərində Ilqar və Elbrus Quliyevlərə məxsus olub.
R.Quliyevin mülkiyyət davası bununla yekunlaşmır. O, Bakının Bilgəh qəsəbəsində yerləşən 1 hektardan çox ərazisi olan bağlı məhkəmə yolu ilə QMI-nin şeyxi Hacı Allahşükür Paşazadənin qudası Hacı Qalib Salahzadədən alaraq nəzarətinə keçirə bilib.
Maraqlıdır ki, sonradan R.Quliyevin şikayəti əsasında bacısı oğlu Elbrus Quliyev həbsə atılıb və istintaqçılar onun qarşısında şərt qoyublar:
“Azadlığa çıxmaq istəyirsənsə kişinin mülklərini özünə qaytar”.
Sonda da elə belə olub. Bacıoğlu Quliyevlər dayı Quliyevə dəyən ziyanı kompensasiya etdikdən sonra Elbrus Quliyev azadlığa buraxılıb.
