Qarabağ qazisini intihara məcbur edən həmkarların sədrinə görə iki qruplaşma üz-üzə gəlib
Qarabağ qazisi Zaur Həsənovun özünü yandırmasına bais olan Azərbaycan Həmkarlar Ittifaqları Konfederasiyasının (AHIK) rəhbəri Səttar Mehbalıyevlə bağlı Prezident Administrasiyasında iki qrup üz-üzə dayanıb. Bu barədə redaksiyamıza daxil olan məlumatlara görə, Prezident Administrasiyasının ictimai-siyasi şöbəsinin müdiri Əli Həsənovun qudası olan Səttar Mehbalıyevin qohumunun təmsil olunduğu qruplaşmaya rəqib komandanın hədəfinə tuş gəlib.
Daha doğrusu rəqib qruplaşma Əli Həsənovun təmsil olunduğu qrupu küncə sıxmaq üçün baş verənlərdən yararlanmağa çalışır.
Məlumatlarda iddia edilir ki, Zaur Həsənovun özünü yandırması ilə bağlı Səttar Mehbalıyev barədə ölçü götürülməməsi qudasının buna qarşı göstərdiyi səylərin nəticəsidir. Əli Həsənov və onun təmsil olunduğu komanda Səttar Mehbalıyev məsələsindən qarşı tərəfin yararlanacağını düşünürək ilk gündən AHIK sədrinin məsuliyyətdən kənarda qalması üçün ciddi iş aparıblar. Əli Həsənov nəzarətində olan media quruluşları vasitəsilə Səttar Mehbalıyevi təmizə çıxarmağa cəhdlər göstərib.
Lakin qarşı tərəf də geri çəkilmir. Bu hadisədən sonra Səttar Mehbalıyev barədə kompramatların dövriyyəyə buraxılması belə deməyə əsas verir. Məlumatlarda da bildirilir ki, AHIK sədrinin “putyovka” biznesi barədə, rəhbərlik etdiyi qurumun fəaliyyəti ilə bağlı bu günə qədər yazılmayan faktların mətbuata çıxması məhz qarşı tərəfin fəaliyyətinin nəticəsidir.
Bildirilir ki, hazırda bu iki qrup arasında ciddi qarşıdurma yaranıb. Lakin hər şey Ilham Əliyevin son qərarından asılı olacaq.
