Vəfa Quluzadə: «İran dövlətinin real dəstəyi olmasa heç bir kürd vilayəti yaradıla bilməz»
Güney Azərbaycanda kürd problemi getdikcə təhlükəli həddə çatmaqdadır. İranın kürdlərdən hazırda soydaşlarımıza qarşı istifadə etməsi, ümumiyyətlə kürdlərə dəstək siyasəti öz fəsadlarını göstərməkdədir. İran parlamentindəki millət vəkili Osman Əhmədinin çıxışını da yürüdülən siyasətin bir məntiqi nəticəsi saymaq olar. O.Əhmədli bildirib ki, Cənubi Azərbaycanın Mahabad vilayətinin adı dəyişdirilərək «Şimali Kürdüstan» qoyulmalıdır. Hazırda kürdlərə dövlət tərəfindən verilən dəstək nəzərə alınarsa, millət vəkilinin təklifi kifayət qədər təhlükəli tendensiya sayıla bilər. Bundan bir müddət əvvəl isə beynəlxalq mediada yayılan «Kürdüstan dövlətinin» xəritəsinə Azərbaycanın Naxçıvan ərazisi daxil edilmişdi.
Politoloq Vəfa Quluzadə hesab edir ki, O.Əhmədlinin bu tip açıqlamaları İran dövləti ilə razılaşdırılmış addımlardır. V.Quluzadənin sözlərinə görə, bu baxımdan da İran dövlətinin real dəstəyi olmasa heç bir kürd vilayəti yaradıla bilməz: «Ümumiyyətlə indiyə qədər müxtəlif xarici dövlətlər kürdləri öz məqsədləri üçün istifadə edib. Amma indiyə qədər kürd dövlətinin yaradılacağı ilə bağlı verilən vədlər reallaşmayıb. Hələ 19-cu əsrdə kürdləri ingilislər öz siyasətlərinin parçası etdilər. Daha sonra eyni missiyanı ruslar həyata keçirdi. Hazırda da kürd məsələsindən yararlanmağa çalışılır. Amma mən düşünmürəm ki, bunun bir nəticəsi olsun. Çünki nə regional, nə də xarici dövlətlər kürd dövlətinin yaranmasında maraqlı deyil. Məsələn, İsrail dövlətinin yaranmasında ABŞ ilə İngiltərə maraqlı oldu. Rusiya isə yeni yaranan dövlətin əvvəlcə sosialist respublikası olacağını düşündüyü üçün bu qərarı dəstəklədi. Amma bu baş vermədi». Hazırda kürd dövlətinin yaranmasında böyük dünya güclərinin marağının olmadığını deyən V.Quluzadə bildirdi ki, ona görə hazırkı bəyanatlar sadəcə olaraq bir təxribatdır.
Hikmət
