“Duru”da bulanıq söhbətlər; keçmiş polis leytenantı ilə axtarışda olan şəxs nəyi ayırd etmək istəyib?
Göygöl rayonunda iki dəstə arasında silahlı insident yaşanıb. Hadisə yanvarın 7-dən 8-ə keçən gecə rayon ərazisindəki “Duru” restoranında baş verib. “Azadlıq” qəzetinin bölgə müxbirinin əldə etdiyi məlumata görə, “razborka” aparan tərəflərdə avtomat və vinçester tüfəngləri olub, silahlar hadisə yerində tapılaraq götürülüb.
Dava edənlərin isə Gəncə şəhər sakini Hüseynov Ilkin Arzu oğlu ilə həmin şəhərdə yerləşən “Daşqın Inşaat”ın sahibi Rəhimov Tahir Şamiddin oğlu və onların ətrafındakı adamlar olduğu deyilir. Bildirilir ki, Ilkin Hüseynovun dəstəsində 5, Tahir Rəhimovun dəstəsində isə 6 nəfər olub.
Məlumatlarda deyilir ki, Ilkin Hüseynov əvvəllər Samuxda “X klub” adlı bar işlədib. Orda 4 nəfər Goranboy və Naftalan sakininini bıçaqlamaqda şübhəli bilinərək axtarışa verilib və hadisə törədilənə qədər də axtarışda olub.
Göygöl rayon polis şöbəsinin əməliyyat üzrə 1-ci müavini, polis polkovnik leytenantı Eldar Bağırov “Azadlıq”ın əməkdaşına deyib ki, baş vermiş insidentə görə bir neçə nəfər saxlanılıb.
Hadisə zamanı Ilkin Hüseynovun yaralandığı, lakin axtarışda olduğu üçün xəstəxanaya müraciət etmədiyi deyilir. Güman olunur ki, o, gizli şəkildə, ev şəraitində müalicə alır.
Davanın digər iştirakçısı Tahir Rəhimovun isə sabiq polis baş leytenantıdır. Onun adı başqa kriminal xarakterli mübahisələrdə də hallanır.
Məlumatlara görə, Tahir Rəhimov bir neçə gün öncə Samux rayonu ərazisində torpaq sahəsi üstündə mübahisə zəmnində Rəqidə adlı bir nəfərin üzərinə silah çəkib. Samux polisi onun hədə-qorxu üçün istifadə etdiyi silahı ondan alıb. Torpaq mübahisəsi zamanı Tahir Rəhimov Samux rayon sakini, hazırda Gəncədə yaşayan Faiq Şərif oğlunu da döyüb. Döyülən şəxs aldığı travmaya görə xəstəxanaya yerləşdirilib. Bildirilir ki, “Duru”dakı hadisə bu “razborka”nın davamıdır.
Samux, Göygöl və Gəncədə “razborka” yerlərində Tahir Rəhimova məxsus maşının dövlət qeydiyyat nişanının tərsinə asılmış şəkillərinin fotosu da çəkilib.
Daxili Işlər Nazirliyi Mətbuat Xidmətinin əməkdaşı Orxan Mansurzadə isə hadisə ilə bağlı “avropa.info”ya bunları deyib: “Həmin gün Göygöl rayonunun Qızılqaya qəsəbəsində yerləşən ”Duru” kafesinə bir neçə nəfər gələrək, orada restoranın tavanına atəş açıblar. Həmin şəxslərin də saxlanılması və məsuliyyətə cəlb edilməsi yönündə iş aparılır. Artıq demək olar ki, onların kimliyi müəyyənləşdirilib və zəruri işlər görülür”.
